PYF, CHT SYNOD ANNUAL CONFERENCE MAWLH KHA!

 

PYF, CHT SYNOD ANNUAL CONFERENCE MAWLH KHA!

(CHT Synod Ṭhalai Inkhâwmpui Lian leh Golden Jubilee Lawmna Thlirlêtna)

                                                                                    ~Pro Pastor Lawrence S. Khawzawl

            “Haflong Kohhranin an thleng dâwn si a, a nuam lovang,” tih kha PYF, CHT Synod Annual Conference vawi 42-na leh Golden Jubilee Celebration tûra mitam tak ṭawngkam a ni. Achhan pawh he Inkhâwmpui hi hmun hla zâwk leh thingtlâng zâwka nei hi kan tih ṭhan vâng a nih mai bâkah, Haflong Kohhran hi Kohhran member-te khawpui chhûng hmun hrang hranga awm an nih a vâng hian hmun danga mite ngaih dânah chuan inkhâwmpuina tûr chuan a nuam vak kha an ring lo a ni ang e. Mahse, tun ṭum Inkhâwmpui nawmzia leh chhinchhiah tlâk a nihzia chu a tir a ṭanga a tâwp thlenga telte loh chuan an tem phain an tawng kher lovang. Chung a nawmzia tem pha leh a nawmzia tawng pha chin zingah ka tel ve hi vânneih ka intiin ka lâwm hle a, hêng ka tawnhriatte hi sawichhuah loh a tân a uiawm hle a, chuvâng chuan hetah hian ṭhenkhat kan târlang dâwn a ni.

            Inkhâwmpui Ropui: Tûn ṭum Inkhâwmpui hi kum dang aia a ropui zâwkna chu PYF, CHT Synod Annual  Conference vawi 42-na mai ni lovin PYF, CHT Synod kum 50-na  Golden Jubilee kum a nih vâng a, a lawmna nêna Inkhâwmpui buatsaih a nih vâng hian a ropui hrim hrim a, chu mai piah lamah Presbytery dang, khaw hla deuh lamah ni lovin CHT Synod Headquarter, Haflong Mission Compound-ah ngêi mai nghah a nih hi a inhmeh hle a. Inkhâwmpui Thuhriltute, zâia rawngbâwltute leh Mi sâwmbîk chi hrang hrangte an rawn kal kim theih hian a ti special-in a ti ropui bik hle a ni.

            Speakers Chhuanawmte: Inkhâwmpui tehna pakhat chu Speaker hi a ni a, chutiang ang bawkin tun ṭum Speaker-te hi an va han chhuanawm tak êm! Rev. Lalramthuara Ngamlai, (Biateram Synod), Rev. Precious Star Tmung (Ri Bhoi Synod), Rev. David L. Chawnlu (CHT Synod) te hi PYF Gen. Assembly-a Leader lo ni tawh ṭheuh, hmun hrang hranga tawnhriat ṭha tak tak lo nei tawhte an ni a, he Inkhâwmpui lian leh chhinchhiah tlâk tak maia Thuhriltu a tâna kan ruat hi an phu hliah hliah a, thupui chi hrang hrang hmanga Ṭhalaite tâna thu ṭha tak tak an sawite kha a manhlain PYF memberte thinlungah nasatakin hna a thawk ka ring a, a rawn pârchhuah ngêi ka beisei bawk.

            Zâipâwl Ropui: Jubilee kum a nih ang hian engkim hi a ṭha vek mai hian ka hria. Kan Synod PYF mâwina pakhat chu Presbytery hrang hrang a ṭanga zâipâwl mahni ṭawng ṭheuhva kan zâi ṭhin hi a ni a, kan inkhâwmpui ropuina pakhat pawh Zâipâwl hi a ni. Chutiang ang bawkin tun ṭum inkhâwmpui pawh kan zâipâwlte an zâi ṭha hlawm hle a, zâi leh hla quality pawh a sâng a, an zâi a nung bawk a, style leh taste-te inang vek lo mahse mahni zâwn ṭheuvah an thiam vek mai. Kan Synod Choir pawh tun ṭum bikah hian an ṭang nasa bawk a, an zâi hrim hrim a nungin a class pawh a sâng hle a, Synod dang zâipâwlte kan tluk lohna bîk awmin a hriat lohva, Pathian hian mal min va’n sâwm nasa tak êm tih mai lo chu sawitûr dang a awm lo.

            Kum danga kan la tih ngai lo bawk, Jubilee lawmna nêna inzawma buatsaih zâipâwl intihsiak “Choral Competition” mawlh mai kha, Presbytery pakua a ṭangin Presbytery panga an intihsiak a, an vâi khan an zâithiam hlawm hle mai. Intihsiakna hla “And He Shall Purify” hlapui har êm êm, kikâwi leh chhuk chho tak mai, Sapho sak chhuah theih tûr chauva ngaih kha keini Tlângmiho zâipâwl ngêi maiin kan han sa chhuak theih kha a ropuiin kan fak Pathian hi a va han lâwm dâwn tak êm. Chu mai a la tâwk lo, intihsiak zawha intihsiaka tel zâipâwl member zarual, kan Synod Choir Conductor Pu Lawma kaihhruaina ngêi maiah an han zâi rual mup mup mai kha a va han ropuiin kha aia ropui kha kan Synod-ah chuan a dang a awm tawh chuang lovang a, vân angel zâipâwlte pawn ropui an tih hial ka ring a sin! Khatiang hla har leh ropui kan han zâirual theih kha kan PYF Gen. Assembly chhûngah pawh Unit dang zâithei an tam viau lovang.

            Zâi lam kan sawi lâi lâi, kan Guest Artiste Nl. R. Lalrinmawii (Arini  Ralte), thiam êm êm mai, aw sâng nalh tak maia Pathian fak han hmuh khân lung a ti âwiin he inkhâwmpui leh Jubilee puala kan sâwm bîk hi a inchhirawm loh hle mai a, kan hruaitute hian thil hi an han thlang thiam tak êm aw ka ti vawng vawng leh ṭhin. Arini Ralte hi Mizoram Synod pumpui chhûnga Ṭhalai pâwl KṬP Branch tin a ṭanga zâithiam thlan chhuah intihsiakna hmasaber Praise On 2016-a lawmman pakhatna dawngtu a ni a, chumi awmzia chu Mizoram Synod chhûnga KṬP memberte zinga zâithiam ber a ni tihna a nih chu. Chutiang khawpa zâithiam kan hruaituten an sâwm chhuak theih hi a ropuia CHT Synod PYF member-ten a thlawna a live ngêi maia kan han hmuh theih hi a manhla hle a ni. Chuan, keini lam Jubilee Nite-a zâithiam te mai bâkah Variety Programme leh Fellowship Programme–a zâi, Presbytery tin a ṭanga kan zâithiam filawr thlanchhuahte pawh an duai bîk lova, mahni ṭawnga zâi mai bâkah English leh Hindi-a thiam tak maia an zâi theih kha Synod danga Ṭhalaite aia kan special bîk riauna a ni a, kan vanneih chungchuang hle mai.

            Sawi hmaih phal loh tûr pakhat chu kan Host te, Variety Programme-a Host- Mr. Henminthang Singson leh Miss. Dorothy Varte ten Senior PYF member an nih ang ngêi maia puitling taka Variety Programme an han hruai te kha a entawn thlâk a, PYF CHT Synod hian kum 50 kan thleng tawhzia a ti chiang bawk a, kan Ṭhalai pâwl hi kan lo puitling hle mai tih a târlang bawk a ni. Chutiang ang bawkin, Jubilee Nite-a kan Host pahnihte Miss Esther Ṭhiek leh Miss Ruthi Nampui ten PYF member naupang zâwkte lungkuai tûr milha lively tak maia an han kaihhruaite, inkhâwmpui tâwp zâna Fellowship Hosts- Abole Zanme leh Mr. Chontangngul Hrangkhol ten zei êm êm maia mipui khatiang zozâi English leh Hindi-a an han kaihhruai theih kha an chhuanawm hle a, hetiang talented tak tak Synod PYF in kan neih hi a ropui hle a, Pathian malsâwmna kan dawng bîk hle hian a lang.

            Session Puitling: Ṭhalai rual e ti lovin, rorêlna pawh kum dang aiin a puitling a, a telte pawh an active-in an thu chaite pawh sawizui leh han tuihnih zauh a tam bawk. Chuan, Jubilee kum a ni kan tih tawh kha, chu chu Rorêlnaah pawh hian a lang chiang hle a, kan thuchai pawimawh bîkah PYF, CHT Synod Constitution siamṭhatnate, Youth Co-ordinator chungchângte leh CHT Synod Choir member thlan dân chungchângte hian sawizui a hlawh bîk hle mai. Rorêlna bâkah hian tun kum hi Hruaitu thar thlan kum a ni a, hruaitu tura Presbytery tin a ṭanga an rawn nominate-te pawh an ṭha hlawm a, kum danga la awm ngâi lo thil pakhat thleng chu Leader (Synod ruat) leh Asst. Leader hi Pastor puitling an ni a, Secretary leh Assistant Secretary hi Pro Pastor ve ve an ni bawk a, Finance Secretary leh Treasurer chauh hi Pastor ni lo an ni! Chuvâng chuan hei hi Synod PYF in hmelthar a nei, Golden Jubilee kuma thilthleng mak leh dangdâi a ni a, a ropui hle mai.

            Host Church Mawlh Hi: A tira kan sawi, Haflong Kohranin inkhâwmpui an thlen dâwn vânga nuam lo tûra ngâite pawh khan a lo nawmzia chu an hre vek tawh ang! Kohhran mite inpêkna a ropui tak meuh meuhva, engkim mai kha a nih dân tûr diktak khan a kal ni hian ka hre ber zâwk. Zingkâr a ṭangin Nuhovin compound chhûngte an phiat fâi a, ṭhenkhatin ei leh intûr an buaipui mawp mawp a, Usher-te lah an zeiin an hawihhawm bawk si a. Chawhmeh tui tak tak nen, thianghlim leh felfai takin min hlui hlawm a, Headquarter-a awm an nih ang bawkin engkim mai kha a changkângin a felfai thlap thlap hle a ni.

            Kohhran mite hmun hrang hranga khawsa an nih a vâng khan Synod Compound chhûngah remchâng tak maiin thleninte an lo buatsaih ta zâwk a, chu chuan hmun hrang hrang a ṭanga rawn kalte tan pawh inlaichinna ṭha a siam a, programme-te hrim hrim pawh a hun takah kan kim hma zâwk phian a, vawi khat na na na chu Synod Compound chhûng kan han luahlum ve hrim hrim pawh kha a nuam a, Pathianni bîkah phei chuan Hall a ṭanga inkhâwm bâng, thingpui in tûra Biakin hnuai lam pana kan han inzui thla dial dial te kha a hmuhnawmin a va han ropui êm! Ṭhalairual khatiang zozâi kan Synod Compound chhûnga nili lai mai hun kan han hmangho theih kha a nuamin a ropui a, hun dangah te pawh programme dang te pawh la neih zel theih i la a ṭha dâwn hle hian ka hria.

            PYF Hruitute An Fakawm: Jubilee kum ber khera PYF Hruaitu an nih kha an vânneih rualin an va han hah dawn tak êm! Mahse an hah ang bawkin Inkhâwmpui leh Jubilee ropuitak mai hlawhtling taka an huaihawt theih kha an fakawm tak zet zet a ni. Kum 50 chhûnga Hruaitu hlui zawng zawngte chawimâwina an pe a, chumai bâkah he Inkhâwmpui leh Jubilee hlawhtlinna tûra hah bîkte châwimâwina an pe bawk a, an dâwn a rilin an huap zâu ka va han ti tehlul êm. Kan Secretary aw pa tak leh hawihhawm taka thu a han puante, kan Leader aw lianpuiin Inkhâwm leh Rorêlna a han kaihhruaite kha a puiin an ti phuisui khawp mai. Kum dang aiin Central Committee Member-te pawh an kal ṭha a, chutiang ang bawkin PYF member- Pastor leh Pro Pastor te pawh an kal ṭhahnem a, active takin engkimah an tel bawk a, a thlamuanawm hle.

            Tlângkawm: PYF, CHT Synod 42^nd Annual Conference cum Golden Jubilee Celebration hi chhinchhiah tûr tam tak awm mahse, kan mi sâwm bîk NEICCYA, CKṬP, CKVP, Jingiaseng Samla leh pâwl dang dangten mi rawn telpuina te kha hmaih phal chi a ni lova, PWF CHT Synod hruaitute mai bâkah PCI Gen. Assembly aṭangin Rev. S.T. Kaia Vaiphei, Administrative Secretary, i/c Youth a rawn tel theih kha chhinchhiah tlâk tak a ni bawk. CHT Synod a ṭangin Moderator Rev. Ngaubuibe Riame-in Jubilee hriatrengna Lung a hawng a, Rev. Lalneithang Hrangkhol, Executive Secretary, i/c Youth in Souvenir a tlangzar bawk a, Synod hruaitu pawimawh tak takte an tel vek bawk a ni.

            PYF CHT Synod Inkhâwmpui lian chu kan han ṭiak ta a, a tirah ruah leh thli a tlet avângin Pandal sakte pawh a tichhe deuhva, Thlenkim zân Inkhâwm leh Rorêlna te pawh Hall-ah nei theih lovin Biakin lamah kan han ṭan kha a ni a, mahse  Pathian kaihhruaina leh awmpuina zâr liau liauvin Hall te pawh thuam ṭhat thuai a ni a, Jubilee lawmna pui ber leh Pathianni lam inkhâwm zawng zawng pawh Hall-ah kan hmang thei vek tawh a, Pathianni zân Fellowship phei chu Hall hnung lam ṭhiah ngai khawpin mipui kan kal ṭhahnem a, a ropui hle mai.

            Mihring famkim lo kan nih angin duhthusâm zan lohnate, fuh deuh lohnate, sawisêltûr leh duhkhawp lohna tûrte pawh awm mahse khatiang Inkhâwmpui lian ropuitak mai kan hmangzo theih kha a lawmawm a, kum 50 tling tawh Ṭhalai pâwl kan nihna hre renga hmalam pan zel tûr leh insiamṭhat kan ngaihnate siamṭha zêl turin ṭan la i la, hma i sawn zêl ang u.  

(He article hi Haflong Presbyterian Kohhran Thalai Pawl chanchinbu "KTP Kartin"-ah March 5, 2023 Sunday khan chhuah a ni)