RIMAWI TUKVERH : Mizo Music Video Review-na ~Lawrence S. Khawzawl
" I
DUH NGE DUH LOH? (Priscilla Fanai- Ka Duh Leh Duh Loh Thlirletna)"
Enge I duh leh duh loh
ka zawt loh a che. Tunlai Mizo hla lar chho mek leh Music Video bawn em em mai Priscilla Fanai hla Ka Duh Leh Duh Loh ka sawina zawk mai a
ni e. He music video a chhuah hma meuh pawha mi tam tak ngaihven hlawh leh hmuh
chak, thenkhatin Mizo Music Video Sexy Ber tur tiha an lo sawi lawk chu MDM YouTube
channel-ah en theih turin chhawp chhuah a ni tawha, hetah hian a music video
thlirletna kan lo nei ve dawn reng mai a ni.
Tha
thawhtute
Kan sawi tawh angin a
hla thupui chu Ka Duh Leh Duh Loh tih
a ni a, a phuahtu hi tunlai Musician lar tak mai Lal K. Sailo kutchhuak niin,
Video lam hi Blue & Yellow Production a ni. Anni mai bakah hian he music
video hlawhtlin theihna tura hmalatu chi hrang hrang an awm bawka, Choreographer-Alan
Rinawma (Mizo Dance Camp), Make up-Hlua Chhakchhuak (Style & Go),
Designer-Escape Engmawia, Eye Lash- Lalhmingmawii Khiangte, Nail Art- Grace
Nail Bar te anni.
Video
chu?
Mizo music video
dangdai ve tak mai chu a ni pakhat phawt mai. A music genre lam hi chu kan sawi
dawn lo nain Mizo hla thluk pangai erawh a ni lova, Colombian zaithiam lar Shakira
music genre leh duhthusama lampui thei chi Latin pop lampang deuh chi niin,
Mizo music kalphung pangai nen chuan a inhlat hle tih erawh ka’n sawi tel hram
ang. A music video pawh a music a danglam ang bawkin, chumi nena inhmeh turin a
settings leh props te pawh rem khawm vek a ni.
A video intanna a Text
rawn inziak pawh Middle East lama mite hawrawp Urdu-Roman script font style-a
ziah niin, chumi han hmuh ringawt pawh chuan a video chhung la en loh pawn
engang tur nge a ni tih a hriat theih nghal awm e. Chuvang tak reng chuan he
video hi Middle East lam Arab culture mila siam niin, an thawmhnaw leh a scene
te pawh thlaler ram ro nula zei tak tak te lam ziarang a kai telh bawk.
I
duhna chhan tur?
A video thupui Ka Duh Leh Duh Loh tih a nih vangin I
duhna chhan tur points engemawni zat kan sawi phawt ang. Mizo Music Video-a kan
la hmuh ngai miah lo hetiang Mizo hla nisi, mahse a hla thluk Latin pop lampang
deuh ni bawk siin, an thawmhnaw inchei dan erawh Middle East lam Arab culture
lam daih ni bawk si, lam lamah erawh thung chuan modern leh Indian lam inchawhpawlh
ni bawk si hi a dangdaina em em leh I duhna chhan tur chu a nih a. Hetiang
music video changkang tak mai culture hrang hrang thil inpawlh video rei lo te
minute 2 leh 52 seconds vel leka kan hmuh theih hi a manhla hle mai bawk.
Chu mai a ni lo, he
music video ti hlutu em em pakhat chu a changtupa Mr. India 2017 1st
Runners Up Navleen Singh, Punjabi tlangval India ram pumpui Mipa te inelnaa
finalist ni pha teh meuh mai a chang hian he music video namai loh zia a
tichiang hle awm e. A ni mai bakah hian Mizo-in tunlaia lam lama kan chhuan em
em te Mizo Dance Camp te lam hmuhnawm tak mai hian a ti phuisuia, Acting lama
sulhnu nei tha em em Adama leh Hruaia Sailo te anla awm leh nghala, reilo te
lang mahse hmuh hmaih chi an ni miah lo. Hemi piah lamah Make-up bawn tak maia
titu Style & Go, Hlua Chhakchhuak hi fak a phu mawlh mawlha, Designer lar
tak mai Escape Engmawi kutchhuak Arab-ho ang theih ber tura an incheina zawng
zawng buaipuitu pawh hi a hah man chu a thlawn dawn lo hle mai. Video shooting na
hmun K.V. Paradise pawh hi a lo remin a theme nen pawh hian a inmilh hle maia,
hemi video shoot-na tur bika an lo sak emaw a tih theih mai dawnin a lang bawk.
I
duh lohna chhan tur?
Mihring kan thuhmun vek
lova, tam takin anduh laiin duh lotu leh duh lohna tur lai hmutu te pawh kan
awm ngei ang. Mizo hla nisi, Mizo hla thluk pangai aia a danglam em avang te, Mizo
cultuer milh ni miah lo, kan mi ngaihsan Sap te leh Khawchhak lam culture pawh
nilo, kan Indian cuture pawh ni em em lo, kan hmelhriat vak lo, Middle East lam
daih based Mizo Music video a nihna avang te hian I duh lo theia, Mizo mipa tha
tak tak leh chhuanawm tak tak an awm laia, Vai ngaisanglo hnam inti, ngai
theihlo leh mahni hnama induh tawk em em ten a changtupa bera Vai han hmang mai
avang te pawh hian I duh lo thei bawk. A hla thu leh a video kalphung a in an
kherlo a vang te leh, a hla recording lamah duhthu a sam vaklo a vangte pawh
hian mitamtak chuan kan duhlo thei mai bawk e.
A enga pawh chu nise,
heng kan sawi zawng zawng piah lamah hian fakna tur leh selna tur tamtak a awm
anga, kan sawi seng dawn chuang lo. Mi sawi atang ringawta lo teh lovin he
music video bawn tak mai hi nangmah ngei ina ngaihdan leh thuthlukna tha I nei
theihnan lo en ve ngei la, chipchiar taka enin I lo enjoy dawn nia!
