MUSIC REVIEW “Ka Khuolzinna” Ruoltinkung Puruolte ( Boia) Album Thlirletna

Album-Ka Khuolzinna (Ruoltinkung Puruolte Boia)
Producer-Pastor Lalrohlu Puruolte & Family
Recording-Dohdoh Records, Ruolngul
Music: Robert Keivom, Bobby Songate, Khuppu
Videography: Uptown Media
Photograph & Graphic Design: DaVals

A Thupui: “Ka Khuolzinna” Ruoltinkung Puruolte(Boia) DVD Music Video hmasatak na a hla hai hi a Kristien khuolzinna lamtluonga a nun keithuoitu le enkawltu niin, a hringnuna nasa taka sinthawha chawmtuhai annih. Chuleichun a album hming khawm “Ka Khuolzinna” tiha inbuk ngat anih.
A Thawtu hai: A produce tu Pastor Lalrohlu Puruolte & Family hi album neitu Boia pa aniha, EFCI Saikawt District ah rawngbawl lai mek anih. Pastor nau hlasakthiem tamtakin Lengzem album ansiem lai, anaupa Gospel Album ngei produce pek theia a um hi ngaisang a umin anrim ra hi a sik ngei ei beisei.
A hla hai khumna Recording, Dohdoh Records le Ruolngul Records hai hi tulaia ding chun min an bel tak, Dohdoh Records lem chu a’ndinna la sawt bek lo nisienkhawm anlar tan meka, ei zaithiem lar Lalruotmawi tapa James Rochullo, music thiemtak el ta niin, Rengkai Bible Hill a an compound sung ngeia inghat aniha. A recording that le that naw chu hi album i ngaithlak a’nthawk hin a chieng lem el awm. James hin tulaia Hmar hla chi hrang hrang ahai a kuthnung amaksan ta teuh ani hih. Hei enla Hmar album hai hi Music a hin James Rochullo ti le Dohdoh Records ti hih hmu rawp el ita, mak ti hran naw rawh. Chupa kuthnung ngei chu anih Boia album ahin inhmai naw ding chuh. Chun recording thawna pakhat lem Ruolngul Records lem lem hi chu Hmar recording studio laia anlar pawltak ti inla ei ti suol kher ring a um nawh. David Ruolngul in an compound ngei, Lower Lamka hmunah a en kawl mek . Inhma deuh khan chu Hmar Album hrim hrima chun Ruolngul Records ti hih a chuong kuou hlak ani khah. Tulai Recording dang dang indinin um ta sien khawm athatna ala chuoi chuong nawh ti sukfie tu chu Boia ngeiin ala hmang ve hi anih. Hieng recording studio pahnihai hi beltlak tak anniha, album la siempei ding hai chun bel chi tak ani leiin insir kher naw nihai.
A hla music mawi taka remtu hai khawm an duoi nawh, tulaia dinga music tienga hriet hlaw tak tak Robert Keivom, Bobby Songate, Khuppu le Zaia hai anniha. “Music hi varities deuh ka dit leiin mi pali ngat ka hmanga, anni hai hi music tienga an background em em chu ka hriet hranpa nawh, amiruokchu a hmuna umhaiin thiem anti hai ka thlang lem el anih” tiin musician a hmang hai chungchang ka zawna chu Boia’n ami sanga, a thlang suol naw zie chu ahla i ngaithlak hunah hre chieng ngawt i tih. A music el chauh nilovin, ama ngei, a hlasak lai a ri leh a hmel mawitaka hmuthei dinga tha thaw tu Videography & Editing hi Uptown Media anniha, Sielmat Christian Higher Secondary School Music Video a an kut them mawizie kha lo hre tasa ka niha, tuta tuma Boia album an them nawk hin an thiem zie ka hriet chieng zuol hle. An kut hnung hrim hrim hi amawiin a felfai em em a, Bungmual, Churachandpura innghat tho niin, Paite hai ngat Churachandpura na na na chuh a thiem filawr tak annih. A album kawm a ding thla nalh taka latu le design tu, Graphic Design & Photograph, DaVals (Joel Vanlalhrat) khawm a thiemna anril khawp el. Inchukna hranpa nei khawm nilo, anhnikna lei chauha mi thawsa hai dam entawna ama le ama inchuk fawm nisi in hieng chen hi phak theiin auma, Boia album chauh nilo, mi dang dang khawm lo design ta hlak, tulaia ding chun hmangtlak tak, a cover printing thawna Offset inlar Diamond Offset a thawklai mek ani bawka, suong aum char char khawp el.
A hla hai: A albuma hin hla 12, Hmar hla 6, Lusei hla 5 le Sap hla 1 a uma, mi hrang hrang phuok annih. Chuong hla hai chu ei hrillang ta angin Kristien khuolzinna lamtluonga nun keithuoi theitu hla vawng anni bawk. Chutaka hla hmasatak “Thiin Thipui Ei Tiu”- Rev,G.B Niropui phuok aniha, thu thra tak el, fielna hla anih. Hi chauh naw khawm hi hla 2 le 4 na hi ama phuok tho anih. Rev.G.B Niropui hi EFCI Pastor niin hla thahnem tawktak a phuok taha, chuonghai chu tulaia inlar tak tak el annih, Inpakna hla bakah hnam hla thatakel “Ei Hnam Mawina” nunghak le tlangval hai ta dinga infuina hla tha taluo ringawt el khawm kha alo phuok ve ngat anih. Hmalai deuh khan a hlaphuok lawrkhawm “Bethesda Collection” alo buotsaih taha, kha taka khan a hla phuok chi hrang hrang a hlu lut hai chu zaithiem dang dang ha’n anlo sak ta bawk. Chubakah EFCI Tripura N Dist. ah Misssion Choir indin in ama hmalakna in album anlo siem taha, a hla phuokhai chu Hmar tawng chauh nita lovin Mizo tawng, Darlong tawng le tawng dang danga sak mek annih. Hi album a ngei khawm hin a hla thatak el pathum chu Boia’n nalh tawk zetin a hung kheksuok pui ani hih. Hi albuma hla pahnina, Lusei tawng Tlawmna Nun khawm hi athu thatak el, lungril tawk theitak hla aniha. Thalaihai puol bika asiem Vanglaini, hla palina hi athu atha el chauh nilovin, a thluk analha, chu kheltiengah Boia chauh nilovin zaithiem dang Deborah Infimate, Sinlung Star Top 3 ngat, tuta ICI Central Choir member nilai mek in a rawl a thawpuia, a video an fu bawk leh en nghawk a um naw tawp el. Hla 3 na Leileh Van Thil hi (L) Pastor C.Saikhuma phuok, hla thatak el, nun thuoitu thatak anih. A albuma sap hla umsun Amazing Grace/ My Chains Are Gone ti hih hla pahni keikawp, hla inlar tak el John Newton phuok Amazing Grace, a thunawn umlo kha Chris Tomlin le Louie Giglio in a thunawn umin an siema, chu chu My Chain Are Gone ti hih anih. Eini rawi chun eila hmelhriet rak da’l thei, ana chu hi album ahin Boia’n chu hla Kristien Hlabu 354 naa um, Hmangaina Mak Rimawi Tak Chu tiha ei hriet lar chu a thunawn umin a hung kheksuol pui ta hlawl el anih. A video khawm en ahadama, mit a suk tlai hlie hlie el. Ka Khuolzinna, a album thupuitak, hla parukna chu David Lalthuoisang le Vanlalhrat hai phuok aniha, anni hi mitam tak chun eila hmel hriet rak ka ring nawha nisienla khawm an hla phuok hi atha em ema, hieng anga quality neitak album Boia’n a buotsaih thupui dinga athlang hiel chu a duoinaw hle anih. Vanlalhrat hi Graphic Design & Editing thawtu tho hi aniha, Boia hin a album siem hma hin ama hla tho pakhat chu music video ah siemin Youtube ah alo sie ta bawk khah. Hla pasarina Thih Thlengin Ama Rawng Chauh, Lusei tawng a sak James Songrolal phuok khawm hi lunglut takel, nu le pa tieng hai dit chi tak, kristen hla pangai thatak el anih. Ama Pu Songrolal hi hla tieng na na na chu a mikhuol naw hleha, hla dang dang alo phuok ta hlaka chulaia inlar deuh chu Ka Thienghlimna kha anih. Hlatienga mi chik tak ani ngei sukfie tu chu Sinlung Star akhan Judge ah Pu.Buonglienkung le Pi.Ramsiemthar hai ruol khan a thang ve ngat anih. Hladang pakhat nawk i ngaithlak ding chu Evan J. Zaihmingthanga phuok A Ang Chhung Nuamah anih. Hi hla hi hla chuoi theilo, hla thatak el aniha, abiktakin eini Manipura Zo hnathlak zaithiem han Mizo hla an sak changa an sak rim pawl tak tiin la a fuk tak awm, hi album a khawm hin Boia’n ahung sak nawka, amiruokchu ama hang sak dan mawlh hin lungril hi athem bikin an lang tlata, thlarau chawmtu thatak ani ring aum. Hi album ahin hla po po lai special bik rieu a uma chu chu hla pakuona Ka Nghakhla Ngei ti hi anih. Ama Boia phuok ngei aniha, asak thiem bawk, ngai a hadam khawp el. Hi hla zo chieha hla i ngaithlak nawk ding chu sap hla inlar tak el, Sungril Damna, Dawn Rodger le Eric Wyse phuok le rem anih. Hi hla hi Hmar tawng thovin Muolvaiphei Female Choir ha’n anlo sak taha, amiruokchu hi albuma mi le hin a thu inlet dan an ang nawha, hitaka mi hi chu ama Boia version ngei aniha. Sap hla Lusei tawnga inlet Kan Engkim Ini, Chris Tomlin, Matt Maher, Matt Redman le Jesse Reeve hai phuok chu a albuma hla sawmpakhatna ah Boia’n a hung sak veha, a sak fuk khawp el. Amiruokchu a video hin mit a suk kham deuha, hla dang naw hai ang takin hi hla video hi hmun khata chauh rem aniha, chu chu stage ni awm taka siem in, chutaka chun Boia chun perkhuong perin hla chu asaka, a vawitieng panga chun nunghak te’n keyboard a rema, a chang tieng naupangpa’n drum a vuoka, a hla le a setting chu an rem hle’l, amiruokchu hienga live music rema suklang ding si chun a thiemsa hai ruoi lem sien chu a fuk lem hmel khawp el. Khataka drum hlaptupa mawlh khan a video quality asuk nep tlat, a drum hlap leh ahla anmil naw chauh nilovin, a mit len velna le a hla ngaisak lova, ahmaa an video shooting thlirtu mipuihai a enkuol vel ni awm tak khan mit a suk kham bawk., chu el chauh chu nilovin hi hla ahin light effect pek dan a khawm inthla da deuh met amani aw ti ding in a um. A iengpo khawm nisien ahla video shoot dan idea hrim hrim hi chu ahla le music leh an mil ve tho. Hla tawpna tak sawmpahnina “ I Ropui Ie” ti hih a tawpna taka um nisien khawm amawi dan adang chuong nawh. Kristien Hlabua mi hla tha tak el, Pathien thilsiem mawi zie puong langna le Pathien inpakna tak tak hla anih. Hi taka hin ama chauh nilovin hlasakthiem takel Lynda Vanlalhriet in athangpui nawka, a mawina adang dai khawp el. Zuk hril taka chun Lynda hi chuong em em chun anlar ka hriet nawha, a hla sak pahni Ruoltha Lal Isu Lalsangawi phuok asak a’nthawk khan ka hmel hriet tana, chubakah Bethesda Collection a khan pakhat dang alo sak bawka chubak chu ahla sak kala ngaithlak nawh. Amiruokchu tuta tuma Boia ahung tawiawm hin ahlasak thiem zie chu inhmaih ruol annawh, mawi tak zet, lungdam hlie hlie in a hung kheksuok veha, a thulam dan khawm ahma nekin a fie ta meta, ami ruok chu suol le sul, pathien le pathin ahai hin la zuk lam tha met sien chu a thiemna hi ngaisang a um nawk zuol hmel.
A changtupa chuh: Mi tamtakin an hril ka hriet chuh, “tu’m Boia hih, a thiem baka” ti anih. Ruoltinkung Puruolte aniha, Boia Puruolte tiha hrietlar anih. Ama hi Pastor Lalrohlu Puruolte le Pi. Vevei hai nau Pathumna niin Chandel dist. Muolcham khuoa pieng anih. Tuhin Rengkai, Thailane Vengah an khawsa mek. Douglas Memorial High School, Rengkaia ah Class- X a zova, Class-X11 chu Imphal tieng a zo bawka Chuhnung ah Bangalore tieng inchukin B.A chu 1st class in a Graduate ta anih. Bangalorea anchuk sunghin thu le hla a rawngbawlin hmun hrang hrang a hai rawngbawlin alo inzin kuol hlaka. Abiktakin Thalai le naupang hai anvawi leiin anni lai a hun tam tak a lo hmang ve hlak anih. Kum 2010 khan a lekha inchukna tieng el chauh nilovin hla tieng pangah a thiemna le an college hming a sukthat em leiin Exchange Student dinga thlang dawka umin USA ah hlaa rawngbawl ding le lekha inchuk dingin thlaruk zet a zu thang ve. A lekha inchukna tieng le hlaa a rawngbawlna a’nthawk lawmman khawm thahnem tawktak alo dawng ta hlaka, chuleiin ama hi duoilo tak ani leiin a album khawm hi a nepnaw hleha, ngainep mei mei ding chi ani naw bawk.

Ka Khuolzinna Album chu February 25, 2012 khan Rengkai Govt. Higher Secondary School Compound ah Rev.Ruolhlei Pakhuongte in mi po po en le ngaithlak thei dingin alo tlangzar taa, tuhin hmun hrang hranga hai mitam takin an thlir mup mup zing. A iengpo khawm nisien, chieng lema Ka Khuolzinna album chu hriet i nuoma ilo la ngaithlak naw ani chun, nei dan ding lo ngaituola, hadam takin lo enla, chu chun a that na le that nawna, i duthusam ani le ni naw chu mit le na ngeiin hrieng i tih. Sawiselna ding tam sien khawm Album dang hai neka a changkang lemna le a dangdai bikna hi inphat ruol annawha, chu ngei chu anih Boia khawma nasataka an rimpui chu. Hmar hai hla tienga ei hmasawn zie, Music Video tienga ei kalchawidan, Musician thiem tak tak einei zie hai hi album an thawk hin inhmai naw tawp ita, chubaka a albuma hla haihin i thlarau nun a chawm ngei beisei a um. En le ngaithlak inhawih le.