NGAIBANTLANG ṬAP RÂWL

 

NGAIBANTLANG ṬAP RÂWL

                                    ~Lawrence S. Khawzawl

Tlâng mâwi taka siemin ka um a, Ram ngaw hring nghien nghuonin,

A sûngah ramsa chitin rêng an tlah a, Thing le ruo, hrui le pâr tinrêng,

Phâi le ruom, vadung le fiertui luong, Zo thlifim hrâng hieu hieuvin,

 

Hmasâwnna, chângkângna an tih, Thing le ruohai râwt chimitin,

Khâwl lirthei hmangin, Leihnuoi chovin, Lam an rît, An ver,

Ân hnîng dum dum leihnuoi, Pil le lunghai an sâwi hnîng.

 

Thing le ruohai an tlu, Tuisam pût siemin, Leilung a thla a phâng a,

Thawthei rêng an nei si nawh. Fûrpui a hung ie, Vânpui a chim dum dum,

Khuongruo a sûr ie, Thlipui, ṭêk, kâwl inlep, Tâwp zâi a rêl nawh,

 

A zuol pei, a zuol pei, Pil a chim, mîm keiin, Thing le ruo an tlu,

Vadung a lien ie, Lungpui ân kûi, Lampui a suk siet, In le lo a del,

Zâ ngâi zâ ngâi, Kan la dam ie, Zâ ngâi rawh, Nu le nâu thla a phâng,

 

Pa thlunglu a hai, Bauvah meikhu a suok, Tlâng inhawitak in suk pâwn a,

Thing le ruo insuk cheurêuva, Vadung lung inlâk zova,

Khâwl lirtheiin leilung insuk siet a, Tuihnârhai insuk tan a,

 

Ram zu le va in that zova, Chuleichun ka nah a, ka châu a nih,

Kân rûm a, sukdam ka ngâi a, Ka ṭap tlawk tlawk a, thlêmtu ka zawng a,

Sukdamtu le tuom mâwitu ding ka mamawh a, ka zawng ruoi ruoi a nih,

 

Ngâibântlâng natna sukdam dingin i ke i pên ve naw ding maw?

A sûnga thing le ruo, a lei le lung, vadung le ruomhai hi,

Indin thar ding le siem ṭha dingin ke i pên ve naw ding maw?

 

(Hi poem/ thusam hi ei ram sûnga siet nasatak a tlungna le inzawma zieksuok a nih)

#Hi Poem hi HSA Assam Hills Jt. Headquarters Conference Silver Jubilee Souvenir SIRBI-ah insuo a nih

MISSION RAWNGBÂWLNA LE ṬHALAIHAI

 MISSION RAWNGBÂWLNA LE ṬHALAIHAI

                                                            ~ Lawrence S. Khawzawl

            Ei hriet dân pangngaia chun Mission chu Ringtu la ni nawhai Ringtu ni dinga an kuoma chanchin ṭha va hril kha a nih a, chuongang rawngbâwlna va thawtu chu Tirko amani Missionary amani tiin ei hril hlak. Mission hi Latin ṭawng missio amani mittere amania inthawka lâk suok a nih a, a umzie chu tir, tir suok, rawngbâwl dinga tirsuok tiha hrilfie thei nîng a tih. Hi mission Bible thu innghatna tak chu Johan 20:21 thu, “Pain a mi tir ang bawkin kei khawmin ka tir chêu hi,” ti hi a nih. Chuleiin, hieng Mission umzie le a Bible thu innghatnahai ei hrila inthawk hin Mission rawngbâwlna chu Missionary amani Tirko amani bîk thaw ding chau ni lovin Ringtu taphawt thaw ding a ni zie chieng takin ei hmu thei a nih.

            Mission rawngbâwlna hi Pathiena inthawka suok a nih a, Pathien ta a nih a, hi rawngbâwlna khârtu ding khawm Pathien bawk a nih. Mission innghatna pawimaw tak chu Pathien hmangaina Johan 3:16, “Pathienin khawvêl a hmangai bêk bêk a, chuongchun a Naupa khât neisun chu a pêk a..,” ti hi a nih a, Pathien hmangaina hmuchiengtu chun hmangaina lungril putin Pathien chu, hi rawngbâwlna sin hi a thawpui hlak a nih. Chuongchun, chu hmangaina luongliem chu Lal Isu’n khawvêl po povah hrildar dinga a ti angin la hre ve nawhai inhriettir dingin ke an pên suok ta hlak a nih. Mi nâwlpui chun hi Mission rawngbâwlna Lal Isu’n ama ringtuhai po po kuoma thaw dinga a ti hi Kohran pâwl thaw ding le Kohran ta chau angin ei ngai hlak a, nisienlakhawm a neitu tak chu Pathien a nih a, Kohran le mitin el hin chu thupêk sukpuitlingna dingin mawphurna lien tak ei nei a nih.

            A chunga Mission umziehai ei hrilnaa inthawk khin hi rawngbâwlna hi vawisûna Golden Jubilee hmangtu PYF P.Hnachangzâwlhai mawphurnaa khawm ân nghat a nih ti ei hriet thar a pawimaw hle. Pathien ringtu le Isu Krista zâra a hmangaina chung chuong dawngtuhai ei ni ang hrimin Isu Krista’n khawvêl po povah feha hril dinga thupêk ropui tak a mi pêk hi ei liengkovah ân nghat ve a nih ti hrein, ei umna hmunah ṭhungmuong el lovin ei theina zâwn sengah sukpuitling dingin ei puonbihai keisînga thoharin ke ei pên ve a ngai tak zet tah a nih. Hi mission rawngbâwlna ropui tak sukpuitling thei dingin Lalpa’n Ṭhalaihai mal mi sâwm raw se. Amen.

 #Hi thu hi PYF P. Hnachangzawl Golden Jubilee Souvenir 2022-ah insuo a nih.

HRIPUI KÂRA PENTECOST NI THUCHA

 

HRIPUI KÂRA PENTECOST NI THUCHA

(Thlarâu Inthieng Umpuina Ei Mamâw)

                                                                                      ~Lawrence S. Khawzawl

 

Vawisûn Pentecost, Thlarâu Inthieng hung tlung ni chu ei lo tlung nâwk dêr tah a, hripui inlêng leiin Biekinah Kohranha’n a ruolin ei hmang tlâng thei naw ding hi a pawi hle a, Pathienin hun ṭha mi la pe nâwk a t’a, a ruolin ei la hmang tlâng nâwk ngêi beisei a um.

Ei khawvêl chu covid-19 hripuiin a mi nuoi zing a, hripui chun ei nunphung pangngaihai a sukkhailaka, nasatakin a mi sukbuoi hle a nih. Jerusalem khawpuiah Tirkohai le Isu Krista zuitu danghai an umkhâwm lâia an chunga Thlarâu Inthieng hung tlungna ni Pentecost ei ti chu vawisûn hin hripui inlêng nasatak kârah ei inhai sengah ei lo hmang a ngâi tah a. Vawisûna eini hai hripuiin ei nunphung pangngai a sukkhailak a, a mi sukbuoi ang bawk hin Pentecost ni hin Tirkohai chu sukkhailak le sukbuoia umin, Kohran indin ṭanna dingin a hmaṭhuoitu an ni bawk a nih. Pentecost hin Krista zuituhai chu thlâkdanglamin dâwizêp le ṭitna a sip a’nthawk huoisen le ṭitna nei lovin a siem a nih.

Thilthâwhai lekhabua ei hmu angin, Pentecost ni chun “Tharâu Inthieng chu ri thlipui hrâng angin a hung tlung phut a, mei anga leihai insemdar a hung inlang a, an rênga chunga chun a fu seng a.” Hi hin Tirkohai chu sukhuoisenin chu nia Jerusalema umkhâwm ṭawng hrang hrang hmanghai ṭawng po pova ṭawng theina thilpêk a pêk bawk a nih. Thlarâu Inthieng hung tlung hin Kohran inṭanna mêllung pawimâw tak a phun a, chuleiin Pentecost hi Kohran ei nina anga ei Birthday, ei piengchampha a nih. Chu umzie chu Tirko Luka’n Thithâwhai lekhabua a târlang angin Kohran hi Thlarâu ṭhuoi Kohran a nih. Indiktak chun, Tirko Thilthâwhai hi Thlarâu Inthieng Thilthâwhai ti dinga âwm hlie hlie a nih: Kohran hmasa thilthâw ding le an fêna ding thutâwp siem hlaktu chu Thlarâu kha a ni rawp hlak a nih. Kohran hmasa khan thuthlûkna lientham siemna dinga chun Thlarâu Inthieng kha an ngâichâng rawp hlak a nih. Thlarâu Inthieng ṭhangpuina umnaw sien chu sâwttak liemta khan Kohran hi tluse dai tâng a tih.

Vawisûn khawm hin Thlarâu chun ei inhawitina a’nthawka mi sansuok a, ei inlusuna a’nthawka mi keihar dingin ei hma ṭhuoiin a mi la vêng zing a. Sienkhawm, vawisûna Kohran hin Thlarâu chu ei ngâisak am? Kohran hmasa anga an thilthâwna ding phawta Thlarâu Inthieng ngâichâng hlak le an hringnun le an thilthâwna phawta Thlarâu Inthieng che vêl hrethei hlak ang kha ei ni ve am? Covid-19 hripuiin khawvêl a sukchi-ai le a sukbuoina a hin, ei ta ding le Kohran ta dinga thlêmna chu ṭit le inṭhî a umna le mâni invêngna le inhumhimna khâta innghatna hi a nih. Thlêmna dang pakhat nâwk chu hripui a hung re met huna ei nunphung pangngaia fea, thil iengkhawm tlungnaw anga uma ei mihriem theina le hrietna a innghatna hi a ni bawk. Ei hun tawng mêk enin nasa nâwk zuola mihriemhai inlâinattuona le Thlarâu Inthieng themthiemna le thilthâwtheina hriet le amaa innghat hi ei ṭûl tak zet a nih.

Thlarâu Inthieng chun Tirkohai a siemthar a, Pentecost hma le Pentecost hnunga an um dân kha zuk tekhin ta’m, Thlarâu Inthiengin thil a thlâk danglam thei zie chu a chieng annâwm. Thâidâwpna a’nthawkin an huoisena, châuna a’nthawkin thafânna, dâwizêpna a’nthawkin ṭitnâwna- hienghai po po hi Isu chanchin ṭha zâr vawng a nih. Hripuiin chi-aina le tuorna tamtak a hung intlunna kâra hin ‘Beiseina’ a um a. Amiruokchu, ei hringnun inthlâkdanglam dinga huoisenna le Thlarâu Inthieng ṭhuoina ei ngâisak a ngâi. Hi corona hripui indar hin einiah ṭitna hripui, mâni inlâkhranna le mânikhâta inhumhim tumna hripui a sukdar theia. Chu nêk chun, Thlarâu Inthieng sukdarna- thilthaw le ṭawngṭâina, inlâinattuona le inhawngna hripui ei lâwmlût lem a ngâi. Thlarâu Inthieng chêtvêlna ding hawngdar le chu hrietna chu ei pawimâw hle. Hiengang hripui inlang kâra hin Thlarâu Inthieng chêtvêlna khawla’m a um a? Iengtin am Thlarâu Inthieng ṭhuoina chu hi hripui kâra hin hrein ngâisak thei ei t’a?

Hripuiin thina le tuorna nasatak intlun sienkhawm, Pathienin hi khawvêl hi Thlarâu Inthieng fethlengin a siemthar nâwk ding a nih. “Ngai ta, thil iengkim ka siemthar ie.” (Isai 43:18, Thupuong 21:5, Isai 65: 17, Ephesi 2: 15). Vawisûna covid-19 hripui kâra Pentecost hmangtuhai hin, Pentecost hmasatak ang khan, tuhin nasa nâwk zuolin Thlarâu Inthieng umpuina ei mamâw tak zet a nih.

Pathien Thlarâu Inthieng,

I var mâwi suok raw se;

Lungril inthimhai sukvar la,

Kan mithai sukvar rawh.

(Hi Thucha hi KANTU Weekly, E-Kantu edition, 23rd May 2021-a insuo hmasa tak a nih)