HMUNSIEM DÂIRIEL CHANG TAH

Zânah lekha ka zir laiin,
Biekhlatna* hung rî chuh,
Chûnnu'n manin âw-râwl chun in,
"Hmunsiem dâiriel chang tah" hung ti chuh.

Lunglai ţhâwng ngêi ie aw,
Thei changin mumang lo chang sien ie,
Tiin keiman lo suongtuo maw,
Sienkhawm tak lo ni chu ie.

An salhrâichawi neihsun muol liem chu,
A chûn le zuo'n iengtin tak ngai ang maw,
Khuonu remruot rêng hi chu,
Hrietthiem a hartak ngei ti naw chu maw.

Hring zalêng ruol tin hai hi,
Nikhat chu muolliem veng ei tih,
Leiin damsûngni chawmtâwi hi,
Khuonu ditzawng in phâmhmang ei tih.

*Biekhlatna=Telephone.
Hi hlasam ''Hmunsiem Dâiriel Chang Tah'' ti hi,July 23,2009 a Muolhawi,Haflong a kan sam suok anih.
Zân khat chu lekha ka tiem laiin phone a hung inri miel miela,ka nu'n lo man in, chanchin lawmum lo tak el Hmunsiem a thi thu chu an hung hrila.Hmunsiem hi kan khaw suokna Khuongluong khuo a Pu.Lalremzîng Keivawm anau pali laia mithlum tak le a nau pasal neisun,a u nuhmei pahni in pasal annei zo hnunga a u nu pakhat le chau umtah annih a.Khawdanga lekha inchuk mek,thiem thei tak el le a pa ha'n a hung puitling ding nghak hla taka an thlir lai,natna inrik taka na in a boral thut aniha.A thi hma hin keini khawm chanchin chu an mi hung hril zing hlaka,hienga a thi thu an hung hril nawk ta el hin ka lungril a ţhawng a,mak ka ti em em a,a pa hai lungnat ding dawn in hi thu hi ka lo insam suok phawng el anih.
Hi hlasam ahin thina ami ţhawng hlak zie le nu le pa chen khawma antuor intak hlak zie le,mi po po nikhat chu a thi ding vawng ei niha,chuleichun ei damlaia Pathien ditzawng a inhmang a pawimawzie hrillang a ni bawk.