KUM 2010 KHAH!

   Kum 2010-ah ei la um laizing ei sawn chu kum 2011-ah ei lo um nawk der tah!A mak i ti ve am? Nikum kumbul lai thova kum 2009 thlirletna ka ziek khah la hnaite angin ka hrieta nisien khawm nikum alo ni lem ta si,hun in rang zie ka hriet chieng zuol sauh chu tie!

     Thil dangah peng hla taluo lovin ei thil hril ding takah lut hmawk lem inla.Kum 2010 khah ei hei suikir luo chun thil ropui,mak le rapthlak tak tak a tlunga,amiruokchu a khawvel pumpui zawng amanih a India pumpui zawng khawmin thlirlet seng naw maniha chuleiin abiktakin kohran sunga le ei ram le hnam sunga thiltlung inchik tlak thenkhat chau ei tarlang ding anih.

   Kum 2010 Tuolbuol ni khatna a khan ei lungril ei zuk sie kir chun Pathien Thlarauvin PYF hai hlapawl rem a'nthawka kohranhai a hung kan tharna khah theinghil ruol ni naw nih.An hlarem  "Lalpa mi hmang rawh..I rawngbawl di'n" ti chu Pathienin atak ngeia hung dawnin kum 2010 sung khan hlapawl rema A rawng bawlna ding chance an hau em em ani khah.Hi thuruk hi tam tak chun an hrietnaw el thei.(hi lai thu hi hun dangah hung ziek ka tih..)Chuonga hun hung fe pei chun Ngaibantlanga Hmar ha'n ei la thawngailo ei rama tlang in sang Ngaibantlanga ngei chun hang fe in a ram ta ding in tawngtaina hang nei anih.Hi tum hin thalai za chuong bakah pastor 1,kohran upa 1 le tuolsung upa1 an thang bawk.Thil ropui em em pakhat chu ei rama tlang insangah Halleluia Chorus khawvela hla ropuitak hang rem ani khah anih.A ngaithlatu ding an um naw luot in van boruok ah Pathien in mupui hai ahung tir hlawl el anih.Kum 2010 sung hin kum danga la um ngailo thilthar tamtak ei thaw suok atam hlea a reng ruok chun hril seng ninaw nih.Muolhoi PYF bika chun nipui chawlkar insukhlimna bakah thlasik/phalbi insukhlimna nikhat nei aniha,chun kumdang ang bawkin Ebenezer Nite nei ani bawk.Thilthar bawk Krismas le Kumthar inkar khan candle light party chu leader in a the bawk.Presbytery level a chun PYF day leh inzawmin Essay writing nei aniha,Leadership Training bakah khawvel insieng tira la um ngai thak lo HLAPHUOK BEIRUOL huoihawt a ni bawk.Hieng po po hin kum 2010 hlutna a sukzuol em em.Chun kohranpui tieng panga chun kohran upa inthlang tum thum zet nei dinga inbuotsaina ei nei kum aniha ei hlawsam kum ani bawk bakah ei pastor Rev.Buongthanglien bakah kohran sunga mi hlun tak tak ha'n muol an miliem san kum anih.Hieng baka hin inchiktlak hieng upa conference le thildang dang ziek senglo a uma tuhri hin chu hieng tieng hi lo tawp san phawt ei tih.

      Hnam thilah intawl lut nawk ta inla,kum 2010 hi Manipur Simthlang Biela Chanchintha lut kum100na aniha,hi le inzawm hin kum bul a'nthawk kum tawp chen hmun hrang hrang ah a lawmna hmang ani khah.Ei ram sunga ngei khawm hmun hrang hrang ah lo hmang ve aniha,puithu taka hmangna chu Muolhoi EFCI ah a um bawk.Gospel khawm nitalo a centenary buoia an buoi mup mup lai N.C.Hills,Ngaibantlang mipuihai tading chun chanchin barakhai umtak el April ni 3 chun ahungtlung ta phawng el.Chu chu N.C.Hills hming vui liema Dima Hasao inbuk anina kha anih.Chu kakhawk chun IPF,IWF,ISF a hung hring suok el chau nilovin parte mawi em em angin a hung vul chuk el anih.Chuongchun Dima Hasao dodalna alang a changa suklangna hmasatak mipui nuor lamhrawna chu april ni 5 khan nei aniha,bandh hmasatak khawm ni9 khan nei tan ani bawk.Hi thiltlung hin mipui a suk chi ai nasa hlea,ei ram chu a suk ralmuongnaw pha a,a sukthlaphang em em anih.Kum 2010 hi ei rama ding chun bandh um ngun tak kum a ni el thei anih aw!Kohran pawl ah zuk lut zawk inla kum 2010 hin Muolhoi Local Churches Jt.Commitee Silver Jubillee hmang a niha.All N.C.Hills Christian Leaders Forum inkhawm vawi khatna Muolhoi EFCI Biekinah nei ani bakah anni huoihawt bawkin la um ngailo Pre Christmas chu Don Bosco Compound ah hmang a ni bawk.

    Hieng baka hin inchiktlak tak tak ziek lang chi um a tih.Amiruokchu chanchin hluihai zuk lakkhawmna ding kanei nawha zuk indawn vat ding an um bawk naw leiin ka lungrila kalo khawlkhawm hai le ka diary a kan chik hai ka hung thailang anih.Ei thu tawpna ding le ahmawr bawkna dinga ka hla tawk tawk le hril kan hawk em em chu Muolhoi PYF sung bing bika thiltlung dang a uma chu chu Nikhat Hmeruo Bazar,Pakaura zeu,Fete le Group Nite zana Grand Sale neihai kha anih.Ka zukziek lang ringawt khawm hin ka lung a leng vawng vawng el anih.Hi thil po po ei hei suikir chun abul thut hung rem tantu chu Kambuong Group ti naw thei an nawh.Chuleiin kum 2010 Muolhoi PYF kha Kambuong Group Inlal Kum tiin la lung dam zan atih.Aw leh,kum 2010 chu ei lo maksan taha, tuta ei kum hraw tan meka hin nasanawk zuola thaw sau sau dingin inbuotsai nawk ei tiu.

                                           (CBCNEI Mission Compound,Guwahati, Tuolbuol 07,2011)