RAM NÊKA HMARHAI THIL MAMAW CHU!

RAM NÊKA HMARHAI THIL MAMAW CHU!

(N.C Hills Sûnga Hmarhai Thil Mamaw Tak Chu Iem?)

                                                                                    Lawrence S Khawzawl

Hun sâwttak a’nthawka ka lungrila kân vawirûk le hrilsuok ka nuom êm êm el, mitam takin thil hotea an ngai ding, sienkhawm N.C Hills sûnga Hmar hnam pumpuiin ei hlâwkpui ding le ei hmakhuo le ei hnam nunzie, abîkin ei khawtlâng nun thleng danglam theitu ding ni tlat si thil a nih a, ka ngai pawimaw ang bawk hin tiemtu le hnam ṭhuoitu, khawtlâng ṭhuoituhai hin mîn vawipui hai sienla, Ram, ram, bifurcation tia ei khêkhai nêka, awl lem le hnam pumpuiin ei sawr ṭangkâi thei ding ni bawk, sawrkârpa chawk luhai lova ei khâta ei thawthei ding thil a ni bawk.

RAM NÊKA EI MAMAW CHU IEM? : Tutaka N.C Hills a Hmarha’n ram nêka ei mamaw chu HALL a nih.  Hall ṭhatak ei neinaw leiin ṭhalai tamtak nun suksietin aum mêk a nih. Hall ṭhatak el, ei hnam pumpui huopa programme ei hmang hai mi dâwlzo ding, programme buoi ṭhak lova ei hmang theina ding, sum tamtak, tha le zung sênga hun ei hmang ral nawna ding le ei hnamin hmasawnna, changkângna ei ti hi a taka ei hraw theina ding chun HALL hi ei pawimaw tak zet a nih.

HALL NEINAW LEIA THIL PAWI HAI: N.C Hills a Hmarhai zuk ti hin a khawpui tak Muolhoi a ni leiin Muolhoi hming sâlin zuk hril bik ei ta.  Hall ṭha ei nei nawh a, ei rênga ami dâwlzo ding ei nei naw leiin ei nun sukhawhlo in a um mêk. Hall ṭha neilo me chu, open air hnuoiah programme ei hmanga, ṭhenkhat vawitieng an inbûma, ṭhenkhat changtieng, ṭhenkhat lampui sirah, thenkhat nawk thung chu kil khatah anlo umbûm nawk a. Mîn thu an hril pha pha ei so mur mura, music an zuk suk puoka, hla ansak chiein ei tlân khâwm nâwka. Ṭhen tamtak chun hieng ding rêng hi ei sawn ta hrim a ang. Hall ṭha ei neinaw leiin zurui hai an huoia, lâmtuol chu an chan ding hrima ngâiin, a châng chun mi mit an suk kham hle hlak.  Hall ṭha neilo na na na chu programme lientham deu ei nei dingin hall bawl thar a ngai zieh a, mihriem tha le zung bâkah hun tam sêng a ngaia, sum tam tak tak ni tlawmte sung programme hmangna dingin peihawn a ṭûl hlak bawka, tu tieng tieng lem hin chu Hall bawla ṭhang ding khawm an vâng ta hle hlak. Ei hall bawl sunhai hlak, ieng ni uollo, programme ei hei hmanga, mi pawimaw tak tak Khuollien le hlasak dingin mi  ei fiela, ei khuo hming inthangna le ei inhai le ei khawsak phung leh enkhi in ei Hall bawlhaiin ei hmâi a suk mâwk nawk hlak si. Hall nikhat, ni hni sûnga dinga zuk bawl fâwm na na na chu, arrangement khawm an fu tak tak thei ngâi nawha, sound le lights system tieng tak tak hin a tuor nasa in ei programme tam tak asuk flop pha hlak. Hall ṭha nilo me chu, khawtlâng pâra ṭhungna hai dawkhâwma, stage inriengtak zuk dawsâng ringawta programme zuk hmang chu, a programme ropuiin mipui fekhawm tamhai sienkhawm mihriem lungril rûk taka chu inngup mat le programme inza taka umdân a vâng. Mipuilai discipline a vâng ta hlak. A nuom nuom an suokin an lûta, an inpel sawl zut zut thei sia. Hieng anga programme a kum têl lo hmang zing zing ta hlak eini leiin, ngaiah ei neia, ei nau le te, ei tu le te hung inṭhang peihai khawmin hieng ding hrim hi sawnin ei umdân anhung sawm peia, iengang programme ei nei khawmin inngup taka thu ngaithla nekin a huou huou le a hlim hlawpna chauh ei ngaina ṭan tah a hawi hle. Hi hin ei hnam le khawtlâng nun a suksietin ei hnam hmasawnna ding pakhat a dâl bawk.

HALL ṬHA NEI HLÂWKNA IEM? : Ka duthusam chun N.C Hills Hmar khawpui Muolhoi a hin Hall lientakel mi singkhat vel bek inlengna thei nei inla, chu chun ei hnam nunphung le ei khawtlang nun nasatakin a ṭha tieng a thleng danglam ka ring. Muolhoi Public Ground, Haire Hai Field tia ei hriet lâra hin chu Hall chu eilo nei ta ding ni sienla, a hall chauh kha nilovin, a sûngah inzunna, inhnâwmna, green room, tui dâwn ding, choka, bufâkna ding hai um vawng sienla chu chun chu ieng programme khawm hmang inla buoi ta ngainawm ei nih a, mihai hmaa khawm muolpho rawp ta nawm ei nih. Hall ṭha ei nei chun a sûngah, lights le sound system hai permanent a inbuk ni tang ata, a operate tu ding hrim um bawk anta, chuonghai nêka pawimaw em em chu Hall intûp tak sunga programme ei hmang hin mipuiin ei inzaa, tuol pâra vâna arasi hai tiem zing thei pum ang kha anta naw tawp el. Ei khuollien le ei hlasakthiem fielhai khawmin ṭhungna inhawi tak chang thei anta, ei hlasakthiem ko hai tak tak hi zurui ruol khawmin baw ngam tanaw nihai. Hall sung intup taka ei inthung khawm ding anta leiin,a lut le suok kha tlawm pha tang ata, mi thuhril laia lo so  mur mur, hlasak huna inbûm khawm thut angkha tlawm pha sawt bawk a tih. Hall sûnga programme hmang le tuol pâra programme hmang hin ei mizie nasatakin a thleng danglam thei ti hi ka chieng hle. Khawpui sûnga Hall ṭha deuva programme ei hmang hai hin buoina neu neu le buorchuor taka programme ei hmang hi a vâng hle, amiruokchu ei khawsûnghaiah Hall sung khawm nilova tuol pâra puon keiphar fâwma programme ei hmang pha pha hin buoina atam sawtin hril sep sep a tam nuom hle. Kohran programme ei hmang phaa inngup deuva ei hmang thei le Hnam programme ani pha pha a buor chuor deuva a um nasan hlak hi ieng dang nilovin Kohran programme chu Biekin intup tak le Biekin Hall ṭhatak sunga hai ei hmanga, Hnam programme ruokchu Hall sung hmangna ding ṭha ei nei nawha, tuol pâra ei hmang hlak leiin a buor chuor ta bik hlak a nih.

Ei hnam hi hnam hmasâwn, hnam changkâng, hnam lekhathiem tiin N.C Hills sûngah mihai mi entawn tak tiin inhril pâwng thur inla khawm, ei khawsûng le ei kawtthlerhai changkâng vieu siin, ei khawsak phung insâng vieu sienkhawm Hall ṭha lientak el Hnam le khawtlang pumpui huop programme hmangna ding ei nei hma po chu ei  social gathering life-style hi lan hnuoi zing ata, mihai nuizat bur ni zingtho ei tih. Ram dang hmun danga hai le ei Hmar chanpui hmun danga khawsa hai chun an khawsung haiah Community Hall dâm, HSA, HYA Hall ṭha tak tak mipui inleng tawk dâm anneia, chuonga hai chun ieng programme khawm annei theia, buor chuor taka programme hmang tihai kha chu tienlai thusim angin an mâksan zo tah. Eini N.C Hills a Hmarhai ruokchu tienlai ei pi le puhai hunlai angelin khawsûng tuolpâra inbûm khawma programme nei ang kha ei la maksan naw zing!

Ei khawtlâng nun, ei social gathering life-style a hin inthlak danglamna, innguptaka programme hmang theina, kohran upa, pastor le hnam ṭhuoituhai khawm inngup taka ei inṭhung tlâng theina ding chun Hall ṭha tak ei nei a ngai takzet a nih. Hi hi ataka fie ei nuom a ni chun thawro ṭhang tlâng ei tiuva N.C Hills pumpui sûnga Hmarhai Hall ding mi tamtak inlêng theina Muolhoi a hin bawl ei tiu. Chu chun ei hnam nun, ei khawtlang nun le ei social gathering life-style a ṭhat tienga an thlak danglam dingzie chu atak ngeiin ei rengin hmu thei ei tih.

N.C Hills sûnga Hmarhai thil mamaw tak chu Hall ngei hi alo nih!

(7^th November, 2014, Guwahati)