NGAIHDAM DILNA

Nih ka duh, midang tâna malsâwmna,
Ka dîl țhîn, malsâwmna ni tûrin,
Ka bawhzui lo ka dîlna;
Ka ngaihsak lo, a tak thleng tûrin.

Midangte țanpui an ngaih ni-ah,
Țanpui an ngâi tih ka lo hre lo,
Min mamawhtu an awm ni-ah;
Min mamawh tih ka lo hre lo.

Mitân malsâwmna nih ka duh nilo'm ni?
Midangte țanpui ka châk nilo'm ni?
Min mamawhtu awm se ka ti nilo'm ni?
Midangte tân inpêk ka tum nilo'm ni?

Dâkchhuak lovin ka inkhâr khuma,
Zawng lovin ka lo nghâk zâwka,
Malsâwmna aiin natna ka lo ni zâwk;
Puitu aiin hnâwltu ka lo ni zâwk.

Tlinglo ka ni min ngâidam rawh,
Ka sualna nên ka rawn pan e,
Malsâwmna nitûrin min siam rawh;
I hman atân Lalpa ka inpe thar e.

(24th September, 2018, Serampore College)