NIDO TANIA

NIDO TANIA
(symbol of anti-racism)

An hrâi bûng dâwn tuaite,
An duâtlai enchimloh;
Chhîngkhual ramah,
Thiam zirin a liam ta e.

A chûn leh zua duhsâm,
A ma duhsâm ngêi pawh;
Puitlin tumin a beih fan fan,
Hmalam panin.

Chhûng leh kua ta’n chauh nilo,
Khua le vêng te;
Hnam le ram ta’n,
A zir mêk an enchimloh.

Pi leh pu nunphung a ngâisâng,
Hnam nihna ah vul chungin;
A nung reng a lairilah,
A ding nghet.

Sam buang hiau,

Chhîngmit tereuh te chuan;

Sakhmel tlângmi mahse,

A chûnnu India a hre reng tho.

 Zirna rûn an chawl,
A chûnnu India khawpui Delhi;
Chawlh hmangin a pan,
U leh nau te hnênah.

Tunge hmalam hun tûr sawi lâwk theia,
Tunge naktuka thil thleng tûr hrelâwk thei le;
Tunge mahni thih hun tûr hmulâwk theia,
Tunge inrinlâwk reng theih bîk?

A hre bîk lo an hraite pawhin,
A chûnnu ram khawpuiah chuan a fawr vêl;
A lenrual damlo zawngin,
Aw a vâi ruai.

A ram ngêiah chuan maw,
Chhîngkhualmi ah ngâiin  vaiho chuan;
An sawisêl a silhfên thuam dân,
Rawlthar chak lai thinin a tuar talo.

Tunge insumzo dâwn le?
Tunge lungawi chuan ang le?
Khuanu siamchhuah pianken hi,
Mahni duhdân ni bîk hek lo.

Aw vâirualte u,
In mâwl em maw?
In khualehtui te pawh hrelovin,
Chhîngkhualmi emaw tih che u chu.

Siamtu khuanu pawi pawh inkhawih,
An hrai dâwntuai thisenin khuanu a koh;
A thlâwnin a liam lovang,
Nido Tania a vulreng thinlaiah.

I hringnun chulram chang mahse,
I sakhming a dâi tawh lo’ng;
I zârah hmarchhak te hi,
Unâuna thlarau kan chang!

Dikna'n ro a rêl anga,
Luipui angin a luang anga;
Chu hunah chuan inthliarna a tawp anga,
Khua vâr kan la hmu ang.

Tania fam chan hian,
Kan ta’n khua vâr hmuhna lo chang se;
A sakhming vulreng sela,
Kan chanvo humhimin awm rawh se.

Aw kan chûnnu India,
I hraichawite eng chen min nghilh dâwn maw?
I hmingmawina tûra kan hahna te hi,
A thlâwnin a liam mai dâwn nge?

Thangharh rawh,
Tho rawh;
Ke pên rawh,
Dikna'n ro rêl tawh rawh!

~ Lawrence S Khawzawl, Zâwlbûk, Shillong, 2013

NOTE: He hlachham (chhamhla) hi kum 2013-a India khawpui New Delhi a misual kuttuara thi, India Hmar chhak, Arunachali tlangval Nido Tania hriatrengna tur leh ama thihna ata India sawrkar a thangharha India Hmarchhak mite humhima kan awm theihna tur leh chi leh chi inthliarna vanga inthahna te a thlen tawhlo nan tiin he thil thleng hun laia ka chham chhuah a ni.