Presbyterian hmunpui Shillong suoksanin ka ngai bang theilo pi le pu hai Ngaibantlang ram chu chawl hmang dingin ka hung pan nawk taha. Tuta tuma ka hung hin lampui intluonin thutin ngaituona’n ka lungril a sipa, chuonghai chu a tawi zawng tak le a fie thei ang tawpin hung sep suok ka nuoma, a tiem aharsa in, alo in phuoi deuh khawmin inngai thiemna ka hung ngen hmasa.
ZOTLANG RENGNU: HILL QUEEN- Queen Elizabeth, Nitla senglo rama Kumpinu nilo, ei Ngaibantlang ram ngeia ei Rengnu ei Hill Queen hi anih ka hriltum chu. Lumding le Haflong inkara nitina a suk le tunga mihriem phur hlaktu hi anih, tuta tuma ka ngaituona hluo tlat tu chu. Eini rawi hi an zin ngun pawl tak eini rek awma, chuleiin eini huopa ei hril khawm hin a fuk phak em em ka ring. Iengtik kuma khah an insuo tan am ani ta chu hrietna ka nei nawh, amiruokchu vawisun chena a pawimaw em em na ruok hi chu ka hriet hle el. Ka hril tum dan tak ruok chu hieng hi anih. Hill Queen hi ei rama inzin hai ta dinga siem aniha, a biktakin Guwahati a’nthawka Jan Satabdi Express a hung Lumding hung panhai Haflong khawpui chen chawl umlova ahung phur tlung theina dingin. Chuong ang bawkin Haflong a’nthawka Guwahati pana fe suokhai Satabdi bawka anchuong theina dinga intlantir anih. Amiruok chu eini rawi abikin inchuklai hai, a hmang rawntu tak hai hin ei chanvo hi ei hriet tlawma, ei nang hmannaw zie khawm hi thuneitu hai kuoma intlun a awm em em anih. Student Association hai damin hma hung la hai sien a tha awm hle. Ei chanvo ei hriet naw chu thu khat nisien ei ta lieu lieu ei ni hamthatna dinga siem nisi a suk khawhlotu chu eini bawk ei ni nawk hlak. Vaihai hi chu aram mi indiktak khawm anninawha, an duot naw ding reng anih. Ticket khawm chawi kher lovin Cheng 10, 20 dam pe in an chuong mei mei hlak. Amiruokchu eini ha’n hihi ei zawm ve ding ani nawh. Ei hamthatna dinga sawrkarin thil a siem ei hmang khawhlo pha pha hin anih sietna a tlung hlak. Vaihaiin chuong ang chun lo thaw hai sienkhawm eini a neitu indik tak hai hin hlawk tak le indik takin hmang tum ei tiu.
AWI KAREI, KAN LAMPUI- Ei khawsung ( Haflong ) lampui hmelsiet zie hi chu anasa anih. Ei lampui a’nthawk hin ei ram hmelhmang indiktak, indikna ei tlasam zie, hleprukna’n hmun a khuor inthuk zie, ei lemder zie a chieng em em. Lower Haflong a’nthawk Bazar panin kan hung intawl pheia, a lampui thatnaw zie chu mitdel khawmin hre thei taluong atih, nitin in ei hraw amiruokchu lampui tha nei dinga kheksuok ngam mi indik ei um nawh. ‘ Welcome to Muolhoi’ ti EGC hai tar ei hung hraw thlenga, Tuolor Bus ngirna hmun lo ni hlak ei hung tlung chie chu aw, a hmel a se zuola, a ru khawm an lang rawng el anih. Thawha, kir vaka,welcome to muolhoi ti khah keithlak ei nuom hiel anih. Alampui hlak inthang thei chuonglo, a umsun auto pahni inpel theina tawk tawk bek hi hei thasien, chu chu hlak duthusam mei mei ani si. Muolhoi khawsung, Hmar khuolaia pui pawl tak tiha, a sunga cheng ha’n an uongpui em em ei hung lut pei chun uongpui nekin kuttin hnara lut tak ei nuom. Lampui pawimaw zie le lampui thilthaw thei zie chu ei hriet, amiruokchu lampuitha neina dinga ke pensuok ngam ei vang. Ei khawsung hmelhmang chu ei hril ta angin ei lampui in a hrilfie uol el. Lampui siemthat el hi thu ani nawh, ieng ang hmangruo am an hmang, atha chi ani am, ieng chen dai ding am, a sum hmu leh a siemna seng so antu am tihai hi ngaiven a hun lem tah. Ei lampui hmelhmang a’nthawk ei depde tak zie, indikna ei tlasam takzie hi lekhabu pakhata inzawt khawp hiel um atih. A ieng po khawm nisien a thufun tak chu mi indik khuo le tui hmangai mi ei mamawzie a nih ka thu tlang insampui chu.
CHUOILOPAR KHAWM A CHUOI ZO TAH- Ei khawsung hring dum dup hlak, mihai khawma hmu annuom em em, chuoilo par ieng chu a chuoizo tah ie! Ei bupang ei sawrkar awfis hai dam hi rausan ram an ang ta ngei! Lower Haflong a’nthawka Bazar ei hung panin department dang dang office ei hung phaka, ei zuk thlir chun mawina tui hnang nekin tuoi tieng an pan tah. Ka lo ngaisang, Information and Publicity Department Office hin ka lung a sukna zuol. Ram dang mi hung hmu ding lem chun ka phal teuh nawh, hre hmang ka nuom lem. Ei ram hin a mawina po po hi a bo san zo tah. Indikna’n hmun a chang ta nawha, hleprukna le depdena, lemderna hri ha’n bu ankhuor inthuk ta leiin, aram hmelhmang mawina khawmin ami tin san zo tah.
AW BUPANG:HAFLONG BANK- Ei hmelhmang indik tak sukfie tu pakhat nawk chu ei Bank hi anih. Hi thu hi hun sawttaka ziek katum a miruokchu ka lo ziek ngamlo, mi ziek dinga ka maksan anachu ka hung phawr dawk nawk anih. Tuhin chu hun alo sawt taleiin, ei hriet chieng tawl taha, inzawt rak tulin ka hriet ta nawh. Ei hlimthla indik tak hrietna pakhat ve anih. Tuta tuma ka hriltum ruok chu mipui hieng zo zaiin Bank pakhat ei la’n tawm zing hi anih. Hlaw la pawl ding leh, sum la suok ding, a thun lut ding, a lekha buoipui pawl leh mi hiengzo zai hi chu a keng tanaw anih. Chuleiin, mi indik ei la um chun ei chanvo hrein Branch thar pahni bek hawng sa dinga nawrna dam hi nei inla,. ATM khawm ei hung hmel hriet tana amiruokchu a hmang dan indik ding angtakin ei la hmang phak nawh. Muolhoi ahin karkhat hung sie sinhai sien ei hmel indik tak hre chieng ei tih. ATM khawm hi ei lan dai naw anih.
INDIKNA: ANNA HAZARE HRI- India rampum chau ni talo, a tuolbawm ram hai chen khawma an hmel hriettah, corruption, hleprukna dotu inlartak Anna Hazare ei rama hin ei pawimaw tah. Ei ram hi hleprukna leia a tuor nasa tu tak eini awm. Amiruokchu mipui hriet ah ei khekri hriet ala ni nawh, ei Council sumbo kha ei theinghil tawl am antah. Chuleiin Anna Hazare anga, hleprukna hnawtbona dinga hma la ngam ei ram sunga hin mi indik ei mamaw hle, ei lo um ani chun chuong ang mihai chun tuhih ke pensuok hun anih ti hrieng ei tiu.
Mipui lai hin mani chanvo indiktak hreha, indiknaw na chu hnawlthla ngama, indikna kheksuokpui ngam ei um pha pha chun ei ram chu atharin parvul nawk ata, ram inhawi le mihai ram ngaisang ram ala hung ni nawk thei chau ding anih. Ei ram hmelsiet zie inkhum mawi ding hin nang le kei hih ei pawimaw tak zet zet a, ke pensuok ve dingin inbuotsai ei tih.
(Muolhawi, 1st Oct.,2011 )
No comments:
Post a Comment