THANGHAR A HUN

              India boruok zau lema ei zuk hip vel chun hun iemani chena inthawk ta khan Jan Lokpal Bill ti le Anna Hazare,Baba Ramdev hai hmingin Chanchinbu,T.V le Thuthar thedarna hmangruo chi dang dang ah hmun a hluo sipa,a chin a lien,a hrenaw sam khawm um talovin mipui lungrilah bu nasatak a khuor tah anih.Tuhin Anna Hazare chun bungheia  Hlemhletna,Corruption ei ti dona chu lien lem,huop zau lem le ropui lemin Ramlila Maidan,New Delhi ah a fepui nawk meka,chutaka chun mipui khawm sangtel tak meuh nitin an thungkhawm ve hlak a nih.Chu chauh chu annawh India ram hmun hrang hrangah Anna Hazare thlawptu pawl an pungpeia an ram a hai  corruption dona chu anlo zawmpei bawk.India Hmarsak a ngei khawm Hazare thlipui hrang chun a hung nuoi ve tana state tina khawpui ahai lo zawm ve mek anih.Nikhat laia Meghalaya khawpui Shillonga lamhrawna a lem khan chu Kohran thuoitu pakhat Rev.K Pyrtuh ,Presbyterian pastor nilai khawm a thang ve hiela,chanchinthar lakhawmtuhai mit atlung hle.Ani ngei hi dona hi Kohran thuoitu le a mipuihai thang vena awm hrim anih,asanchu Pathienin,thamna,kuttlinglova sum lamna,hlemhletna hai hi a ditnaw leiin.Assam ram bika khawm Akhil Gogoi le arawiha’n hma an fe pui mek zing bawka,Guwahati khawpui sunga le hmun dang danga hai lam hrawna hai fepuimek anih. The Times of India,nitin chanchinbu in Ningani,August 25.2011 a a tarlangnaa chun Akhil hin N.C.Hills Autonomous Council sumbuoi thu kha Team Anna in ‘India Against Corruption’ hnuoiah  National Issue ni dingin rampum huopah a tarlang tum mek a tih.

                Eini N.C.Hills Autonomous Council hnuoia  mipuihai hi teh khawtiem ei uma,ei ngirhmun ei hriet am? Corruption,hlemhletna leiin  Lalrama ei rawngbawlna hai,ei fak-le-dawn ngirhmun le nitin khawsakna hai a suk khailak tak zet ani hih.Hienga mi’n ei bubel chanchin mawilo tak rampum huopa hma anlak tum laizing hin eini a sunga cheng amipui hai hin teh  iem ei ngaituo in iem ei thawha? Corruption leia ei tuorna hai hi ei to tawk tawk pui el ding maw? A ieng pawl khawm ni rawse ei renga luong khawma ei do ve hi a hunta naw manih? Thaw ro ei ram le hnam hmelma,retheina le suolna,thabona hai  suk pung tu Corruption hi N.C.Hills mipuihai hin dovin hnawt zam veng ei tiu….