MA TA RO !

MA TA RO !

 Vânkhup hnuoia hin thil tinrêng ta dingin hunbi a um a, Thil tinrêng ta dingin hunbi a um seng (Thuhriltu 3:1 BSI-CL)

Lawrence S Khawzawl

Hi leihnuoia um thil po po hin hunbi ei nei senga, chu hunbi ang pei chun ei um dân khawm inthlâk danglam peiin, a ieng el khawm hi a pangâia um zing alo um rêng rêng nawh. A chunga ei thupui hnuoia Thuhriltu ziek ei târlang ang khin ei pieng a’nthawkin hunbi ei nei peia, ei thi chenin hunbi chi hrang hrang ei hraw ding a um. Amiruokchu chuong hunbi hai chu hlimna le lawmna chauh ani nawha, iengkim el, harsatna a’nthawk hlimna chenin ei paltlang vawng a ngai anih!

Nipui, thlasik, fûr le favangha’n

Hunbi annei ang hin

Hlimni, lawmni, ṭap le lungngai niha’n

I hringnunah hunbi annei

Nipui lai chun a lum tiin ei chiera, insuk dei dân ding ei zawng ruoi hlak. Thlasik a hung inṭana, a hung dei nâwk ta dêra, thuomhnaw lum a inbel zing a hung ngai tah a, a deizuol châng lem chun sûn changlai khawm nisatna zawngin nilum hnuoiah ei umkhâwm hlak hi. Chuong huna chun nipui lai ei ngaia, nipui tlung vat vat sien, thuomhnaw lum hai peithlâka nipui thuom a inbel chu ei châk ngâwi ngâwi nâwk ta hlak. A châng lem chun khuo a’n ṭhâla, pilvut a khû a, tui a hung vâng a, ei pang hai a hung ṭâwl bawk leh, fûr lai ei ngai rawng rawnga, fûrpui hun nitasien, dûtâwka thuomhnaw bal hai sâwpna ding le tui dûtâwka insil theina ding ei ngaituo a, pilvut khu chum chumin ei lamlawn lai ami hrâng khum khawm bo tang ata tiin duthu ei sâm nâwk hlak. Fûrpui tak tak chu a hung tlung ta a le, ei suok khawmin ei hulṭha hlei thei ta nawh a, ei thuomhnaw hu hai emhul na ding ei invâi nâwk tah a, ap burh anga inngaina ei neia, tui hau inla khawm a dang mamaw eila nei nâwk peia, ei suokna ding tak a khawm suok harsa ei tih. A  chângchun riel dâm, ṭêk dâm a tla a, kâwl dâm a’n lapa, thlipui le thlisie dâm a hung hrânga, in le lo sukse in, mîm keiin lampui hai ala suksiet nâwk nghala. Chuong hun tak taka chun anih fûrpui hun chu ei nghawk bêk bêka, ei ning an tel nasa, a tâwpkhâwk ah favâng awllên hun ei ngaina a hung zuol nâwk ta hlak ani ie. Hieng hunbi chi hrang hrang hai hi ei ngaituoa, chîk taka an um hun hai ei sui chieng chun Lal Solomon in alo ziek ang hrimin thil po povin hunbi annei zie chieng takin hre thar eita, chu huna chun chier pei ta ngai nâwng ei ta, iengkim hre chieng tâng ei tih. Chu bâka chun thil dang hieng hlimni, lâwmni, ṭap le lungngaini khawmin ei hringnunah hunbi annei hlak ti hre sâ bawk ei tih. A khêltieng rama chun hi leihnuoia thil um hai chauh nilovin vânsânga thil um hai: nisa, thlâpa le arâsi hai khawm khin êng hun bi annei seng. Nî chu sûnah a êng hlak a, thla khawm hunbi neiin zânah a êng hlak a, arâsi khawm hunbi neiin mâwitakin a êng an suo hlak hi.

Ni le thla le arsi hai khawm khin

Êng hunbi annei ang khin

Hlimni, lawmni, ṭap le lungngaini ha’n

Mihriem nunah an in êng sâwk hlak

Thil po povin hunbi annei seng ti ei hriet tah a, hieng hunbi haihi a dawt dawta, a hmatiema a hung tlung châng a uma, chuong anga tlung ding rênga ngaina khawm ei nei thei. Amiruokchu a châng chun  thil a ruola a hung tlung châng a um châwk hlak. Arâsi a êng lai mêkin thlâpa a êng hlak ang le, nisa a êng zing laiin ruo dâm a hung tla hlak ang hin, I hmaah hlimna a tlung lai zing khawmin khingtieng pangah lungngaina a tlung châng um ata, innui lai zingin ṭapna ding a um châng khawm um thei atih. Sienkhawm hieng po po hi nangma suksetu ding che le nangma a châu sawngna petu dinga thil hung  tlung ani nawh a, thil nîphung hunbi nei hrim I chunga a hung tlung hun ania, ruo a sûr khawmin tâwp hun a neia, chu chu sumrisâng mâwitak hung inzâmin a sunzawma, ni a hung êng suok nâwk hlak ang hin hieng I harsatna hai po po khawm hin inkieng hun nei ngei antih.

Ma  ta ro ṭap ta naw ro

Kumtluongin sûm a zîng ngainawh

Ma ta ro ṭap ta naw ro

 Kumkhuoin  ruo sûr naw ni

Tu khan I lungngai am? Tu khan I hringnunah harsatna I neih am le? Tu khan ila beidawng rawp am? Beiseina nei ta lovin, beiseibo beisei in in hriet na ilo neih ta hiel am ie? Chuong ani chun maw, hi vânkhuphnuoia thil po po hin hunbi an nei seng lei hin kumkhawtluongin I chungah sûm  zîng  zing bîk chuong naw niha, kumkhuoin I chungah ruo sûr zing chuong ta naw ni.  Iengkimin hunbi annei ang bawkin ei harsatna, ei lungngaina, ei mangangna, ei lungzîngna,  ei retheina, ei natna le ei beidawngna hai hin inkieng zâi an la hung rêl ding ani leiin  ṭap ṭap ta lovin lo ma ta ro!

                                                                                                        (10^th September, Guwahati, Assam)