NIDO TANIA (symbol of anti-racism)

NIDO TANIA
(symbol of anti-racism)

An hrai bûng dâwn tuoite,
An duotlâi enchimlo,
Sîngkhuol ramah,
Thiem zirin a liem ta ie.

A chûn le zuo dûsâm,
A ma dûsâm ngêi khawm,
Puitling tumin a bei tâng tâng,
Hmâtieng panin.

Sûng le kuo ta ding chauh nilo,
Khuo le vêng hâi,
Hnam le ram ta dingin,
Ân chûk mêk an enchimlo.

Pi le pu nunphung ngâisângin,
Hnam nîna ah vul zingin
A hring zing a lâirilah,
Det takin a ngîr.

Sam sen hieuin,
Mit chîn tê in,
Pum duong lien lovin,
A chûnnu India a hrietzing tho.

Zîrna rûn an châwl,
A chûnnu India khawpui Delhi,
Châwl hmangin a pan,
U le nâuhâi kuomah.

Tu'm hmâtieng hun ding hrilh lâwk thei a?
Tu'm zînga thiltlung ding hrelâwk thei leh?
Tu'm mâni dam chen ding hmulâwk thei a?
Tu'm inringlâwk zing thei bîk?

A hriet bîk nawh an hraite khawmin,
A chûnnu ram khawpuia chun a fawr vêl,
A lenruol damnâw zawngin,
Aw ân vâi ruoi.

A ram ngêia chun maw,
Sîngkhuolmi lo sâwnin vâiruol chun,
An deuh saw a silfên thuom dân,
Râwlthar hrâtlâi lung ni ta nawh.

Tu'm insûmzo ding leh?
Tu'm lungâwi chuong ding leh?
Khuonu siemsuok pienhmang hi,
Mâni ditdân ni chuong si lovin.

Aw vâiruolhâi,
In mâwl ngêi maw,
In khuoletuihâi khawm hrelovin,
Sîngkhuolmi sâwn chêu chuh.

Siemtu khuonu pawi khawm inhrilh,
An hrai dâwntuoi thisenin khuonu a ko,
A thlâwnin liemnaw nih,
Nido Tania a vulzing lunglâiah.

I hringnun chulram chang sienkhawm,
I sakhming a bo ta nawh,
I zârin hmarsakhâi hi,
Unâuna thlarâu kan chang!

Dikna'n ro la rêl a t’a,
Tuipui angin la luong a t’a,
Chu huna chun inthlierna la tâwp a t’a,
Khaw êng la hmûng kan tih.

Tania fam chang hin,
Ei ta di’n khuo êng hmûna lo changsien,
A sakhming vulzing sien,
Ei chanvo humhimin um râw se.

Aw kan chûnnu India,
I hraichâwihâi ieng chen min nghilh ding maw?
I hmingmâwina dinga kan sâwlna hâi hi,
A thlâwnin a liem el ding maw?

Thangharh rawh,
Tho rawh,
Kê pên rawh,
Dikna'n ro rêl ta rawh!

                                                             ~Lawrence S Khawzâwl, Zâwlbûk, Shillong-01

NOTE: Hi hlasam (poem) hi kum 2013-a  India khawpui New Delhi hmuna  misuol kut-lum tuora famchang, India Hmarsak, Arunachali tlangval Nido Tania hrietzingna ding le ama thina a’nthawka India sawrkar a thanghara India Hmarsak mihai humhima an um theina dinga chi inthlier hrangna leia inthatna hai a tlung ta nâwna dinga kan samsuok a nih.