INNGHILH LO'NG U AW!

Hriat ngâi lo kha, kan inhria a,
Intawng ngâi lo, kan intawng a,
Inbe ngâi lo kha, kan inbia a;
Unâu ni ngâi lo, kan inunâu a.

Damlâi hringnun, kan chhiar za,
Zirna rûnsâng, kan kâi za,
Thiam finna, kan zir za;
Kan hlim, hmalam kan thlîr za.

Hringnun hi zawng, duhthu sâm lo,
Engkim mai hi, kumhlun tûr awm lo,
Hlimni zawng, chatuan daih ni lo;
Awm hlen tûr zawng, kan lo ni lo.

Inhre țhin kha, kan inhre tawh lo anga,
Intawng țhin kha, kan intawng tawh lo anga,
Inbe țhin kha, kan inbe tawh lo anga;
Unau ni țhin kha, kan inunau tawh lo anga.

Mahse keini zawng, inhre reng țhin ila,
Intawng tawh lo paw'n, inhre reng țhin ila,
Inbe reng tawh lo paw'n, inngaina reng tho ila;
Unau angin awm tawh lo paw'n , inngaina reng ila.

Kan țuanna mual leh tlâng, dang tawh mahse,
Kan thinlai lungril erawh, awm dûn reng se,
Innghilh lo'ng u aw, kum tam pawh liam mahse;
Biahthu hlan chhunzawm zêl ang, karmah hla se.

                   (Bengaluru, 24th April 2018.)
NOTE: He Hlahril/ Chham hla hi Serampore College a kan Senior 2018 Batch-a Graduate zawng zawng te tan ka hlan e!