INNGAIHSAKNA

INNGAIHSAKNA

~Lawrence S. Khawzawl, Serampore College

Mihringte hi ‘social animal’ kan niha, mahni chauhva awm theihlo, a ruala awmkhâwm leh inpuih tawn ngâi mihring kan ni. Mizo hnam bîkah pawh hmanlai kan pi leh pute hun a țang tawha awmkhâwm țhin, chhiat-țhatni pawha a ruala engkim titlâng țhin, hnathawh leh inpui a țûl châng pawha ti ho dial dial țhin kan ni. Vawiin thlenga kan khawtlâng nun leh inkaihhruai dân en pawhin chutiang kan pi leh pute ziarâng hlimthla chu a la lang reng. Nimahsela, tunhnai lawk, țhangthar generation leh digital world kan palh mêk tâkah erawh tlêm tlêmin kan nunzia a rawn dang țana, kan pi leh pute nunzemâwi te kha zâwi zâwiin a rawn da țan mêk zêl bawka, kan hnam nunzemâwi mai bâkah kan Mizo Kristian nunzemâwi țha êm êm inngaihsakna pawh tunlai khawvêl kalphung hian a rawn thlâk danglam țêp tawh.

Inngaihsakna hi kan Mizo nunzemâwi a nih mai bâkah kan Kristian inzirtirna nên pawha inmilh êm êm, midangte ngaihsaka midangte nêna inlaichinna țha siam hi mihring tutan pawha thil țha leh kan mamawh a ni. Lal Isua Krista thupêk ropui, khawvêl zawng zawnga kala chanchin țha hrilh tihpuitlinna tûr pawha pawimawh êm êm chu midangte ngaihsakna hi a ni. Midangte ngaihsakna thinlung kan neih loh chuan an hnênah chanchin țha ava thlen thei ngawt lo. Chuvâng chuan inngaihsakna hian engkim hi a lo huam vek mai zawng a ni! Mi kan ngaihsak lo na na na chu kan hmangaih theih hek lovang, hmangaih tûr pawhin ngaihsak phawt a ngâi. Chhûngkua pawh chhûngkhat kan nihna leh kan inlaichinna a nghet zual zêlna tûr chuan kan inngaihsak țheuh a ngâia, kan inpui tawna, kan inhmangaih tlân dial dial a ngâi. Chutiang nilova a tu a mah pawh inngaihsak lova kan awm duh dân ang ang leh kan nih ang anga kan kal zêl a nih chuan chhûngkaw duhawm leh hlimawm, țangrual leh mite awt Kristian chhûngkaw țha kan ni thei lovanga, hma kan sâwn thei lovang. Mahse nu leh paten fate kan ngaihsaka, fate pawn nu leh pate kan ngaihsaka engkimah kan inngaihsak tawn vek a nih chuan chhûngkaw nuam tak kan ni thei ang.

Kohhran rawngbâwlna, abîktakin Țhalai pâwl rawngbâwlnaah pawh hian inngaihsak tawnna hi kan mamawh hle mai. Hruaituten kan member-te kan ngaihsak anga, member-te pawn kan hruaitute leh kan member-puite kan ngaihsak a pawimawh hle mai. Member-ten hruaitute thil tih kan puih theihna zâwnah chuan antih tûr rêng a ni tia enliam mai lovin a țûl ang anga puiha inngaihsak tûr kan niha, chutiang ang bawkin hruaitute pawn kan member-te an active emaw active-lo emaw kan huangchhung amite chu kawng engkimah kan ngaihsaka rawngbâwlnaah an rawn tel theihna tûra kan ngaihsak zêl a pawimawh hle mai. Hnatlan nikhuaah te, branch /group sum tuak nikhuaah te, hla zir, inkhawm leh activities hrang hrangah te hian ka tello pawhin anti thei a lawm tia mahni lo inthiar fihlim mai loh hian, ka tello chuan kan mawi zo lovang tih rilru pua midangte thiltih ngaihsak hi Kistian thalaite awm dan tur dik tak a ni. Rawngbâwl tûra chhandam Kristian Țhalai Pâwl kan nihna vâng mai piah lamah, kan hnam nunzemâwi tlâwmngaihna kan neih avâng pawh hian damloh ni, chhiat-țhat niah te pawh hian ingaihsak tawn tûr hrim hrim chu kan ni a lâwm! Chutianga kan inngaihsak tawn thei a nih ngâi chuan Țhalai pâwl rawngbâwlna a hma aiin a chak zâwk anga kawng engkimah hma kan sâwn ang.

Rawngbâwlna hi mimal ta bîk a nilova, pâwl, a huhova kan thawk tlânna hian a ti ropuia, a ti zahawm țhin. Chuvâng chuan Kristian Țhalai Pâwl te hian inngaihsakna hi kan uara, kan ziaah kan neiha, hmalam kan pan zêl a pawimawh. Inngaihsaknaah chuan inpawh tawnna, inthurualna, inhmangaihna a awma, hmasâwnna leh rawngbâwlna tluantling a awm țhin. Rawngbâwl tûra chhandam țhalaite hian a hma aia kan rawngbâwlpui, kan member-puite leh kan hruaitute nên inngaihsak tawn thar leh ila, kan thil tihna zêlah lungrual takin Lalpa rawng I bâwl zêl ang u.

**He thuziak hi KTP Khawzawl Kawnzar Branch Kumpuan “Inngaihsakna” tih puala ka ziah a ni.