INNGHILH LO'NG U AW!

INNGHILH LO'NG U AW!

Luh ni a awma,

Chhuah ni a awm țhin,

Lawmluh ni a awma;

Thlahchhuah ni a awm țhin.

Hmelthar nih hun a awma,

Hmelhriat nih hun a awm țhin,

Nau nih hun a awma;

U nih hun a awm țhin.

Hriat ngâi lo kha, kan inhria a,
Intawng ngâi lo, kan intawng a,
Inbe ngâi lo kha, kan inbia a;
Țhian ni ngâi lo, kan ințhian a.

Damlâi hringnun, kan chhiar za,
Zirna rûnsâng, kan kâi za,
Thiam finna, kan zir za;
Kan hlim, hmalam kan thlîr za.

Hringnun hi zawng, duhthu sâm lo,
Engkim mai hi, kumhlun tûr awm lo,
Hlimni zawng, chatuan daih ni lo;
Awm hlen tûr zawng, kan lo ni lo.

Inhre țhin kha, kan inhre tawh lovanga,
Intawng țhin kha, kan intawng tawh lovanga,
Inbe țhin kha, kan inbe tawh lovanga;
Țhian ni țhin kha, kan ințhian tawh lovanga.

Mahse keini zawng, inhre reng țhin ila,
Intawng tawh lo paw'n, inhre reng țhin ila,
Inbe reng tawh lo paw'n, inngaina reng tho ila;
Țhian angin awm tawh lo paw'n , inngaina reng ila.

Kan țuanna mual leh tlâng, dang tawh mahse,
Kan thinlai lungril erawh, awm dûn reng se,
Innghilh lo'ng u aw, kum tam pawh liam mahse;
Biahthu hlan chhunzawm zêl ang, karmah hla se.
                 (Bengaluru, 24th April 2018, Serampore College, 14^th March 2020)

NOTE: He Hlahril/ Chham hla hi Serampore College a kan Senior 2018 Batch-a Graduate zawng zawng te thlah nan Bangalore-ah Practical Ministry titura kan awm laia ka ziah a ni a, kum hnih hnuah keini 2020 Batch te kan chhuah dawn meuhvah chuan kan Junior zawk te’n min thlah huna chhiar chhuah a tan leh min hriat reng nan chang khatna le chang hnihna khi ka phuah belh-a ka siamtha leh ta a ni.