RINGTU ṬHA CHU KHUO LE TUI ṬHA KHAWM A NI HLAK ~
Lawrence S Khawzawl
Khuo le tui ṭha ni ding hin
mi hausa ni a ngai nawh a, thiemna insang nei a ngai bawk nawh a, mi hriet
hlaw tak ni a ngai chuong bawk nawh. Khuo le tui ṭha tak ni ding chun ieng ang
mi khawm ni inla, ni ei nuom a, nuomna kha ei niah ei pâi phawt chun tu ang
khawm ei ni thei vawng.
Khuo le tui ṭha chun
khawtlâng a siemṭha theia, chu chun ram le hnam hmasâwnna a’n tlun thei bawk.
Mi’n a ram a hmangaia, a hnam a’n vawi a ni chun khuo le tui ṭha a ni ngêi ding
a nih. Khuo le tui ṭha ni si lovin ram le hnam a hmangai thei nawh a, khawtlâng
ṭhatna ding iengkhawm a’ntlun thei bawk nawh. Dik tak chun mihriem ei
nih a, khawvêla chêng ei nina zâra hin khuo le tui ṭha ding chu eini âwm hrim a
nih. Amiruokchu, ei nina ei hriet naw lei amani ei mâwl lei amani ding khuo le
tui ṭha tak tak hi ei vâng nuom sawt hle. Thil ropui le lien tham taluo, mi tam
tak thawthei ruol lo thawha khuo le tui ṭha ni kher a ṭûl nawha, mi po po
thawthei, thil ho te ni a inlang mei mei dâm, thil intak bêk lo hai thawin khuo
le tui ṭha nina chu ei hlâw thei. Mihaiin iengma lova an ngaihai kha siem ṭhain
khuo le tui ṭha chu ei lo ni thei zing an nawm.
Abîktakin eini
Ngâibântlânga chêng Hmarnâuhai hin khuo le tui ṭha ni ding hin ṭhang nasatak ei
lâk a hun ta takzet. Ei ram chite tluse mêk le indik nawna, duâmna le ro fello
tam tak inkhumna rama hin thaw ding ei va hau de. Sawrkar thuneitu tieng pangah
indik nawna chi tamtak lo um sienkhawm eini a mipui chit hai hin ei nina sengah
ringum tak le indik taka ei thaw ding ei thaw chun khuo le tui ṭha chu ni ve
ngei ei tih. Eini chau indik taka um hi a hun tâwk dêr chuong nawh, mi indik nawhai,
indik naw taka thilthaw hmanghai, sawrkar fe dan indik lo dâm, thil ni phung
ding hrâw indik lo le thil tam takel a uma chuonghai chu lampui indika an fe
theina dingin mawphurna ei nei bawk. Mihriem ei nina el khêlah
Krista hnung zuituhai ei nina lei hin khuo le tui ṭha ni chu ei nina ding hrim
lem a nih. A chîn tak a’nthawka a lien tak chenin khuo le tui ṭha ni dingin
mawphurna ei nei.
Khuo le tui ṭha
ni ding chun mâni insûng a’nthawk ṭan a ngai. I in kâwl le kieng ta
dingin hnawksak um I ni am? I um a ni chun khuo le tui ṭha ni thei
naw ti nih. Mâni ram sûng chau sukfâia mani ram puotieng, lampui kâwlhai sukfai
chuong si lo I ni chun khuo le tui ṭha I la ni nawh. Mâni chi le kuonghai chau
ngâisaka, mâni chipui ni lohai ngâisak chuong si lo I ni chun khuo le tui ṭha I
la ni naw rawp. Ei ram a bîkin Ngâibântlânga khawm Vawngzâwl biel hi zuk en la,
a’n rieng zie le a hnungtawl bîk zie hi hmu ngei I tih. Hi hi ieng lei am ni’ng
a t’a? Sawrkar thiemnaw lei am mipuihai thiemnaw ni’ng a t’a? Mipuihai khuo le tui
ṭha ei la ni tâwk naw leia la hnungtawl zing ei ni el rawi am? Ei biel sung
hlak chu Ringtu ei nina khawm kum za tling vâng ei ni tah a, Ringtu ni siin
ieng leia ringnawtuhai nek khawma la hnufuol zing am ei nih a? Ringtu ṭha ei ni
naw leiin khuo le tui ṭha khawm ei ni thei nawh a chulei chun ei biel khawmin
hma a sawn thei naw a ni el naw ding maw? Inngaituo thar a va hang ṭûl de!
Tirko
Paula chun ringtuhai chu khuo le tui ṭha ni dingin a min fui a. Chu chu Isu
Krista inchuktirna le khawm an mil hle bawk a nih. Khuo leh tui ṭha
chun dan le thupek an zain a zawm ṭha hlak a, khawtlâng ta dinga hnawksak
le buoipui ngaiin a um ngai nawh a. Khawtlang roreltuhai an zathiem hlak a, a
in le lo felfai takin a vawng ṭha a, khawtlang le tuolbawmhai ta di’n hnawksak
le phunnawina siemtu a ni ngai bawk nawh. Khuo le tui a ni angin a chunga
thawding hung tla chu a hlen hlak a, tlangsin le thaw ding ṭulah a tlanase ngai
bawk nawh. Midanghai ta dinga malsawmna ni dingin theitawp a suo hlak a nih.
Awle, ieng ngirhmunah am ei ngir ve le?
Mani in en lêt ei ta Ringtu ṭha le khuo le tui ṭha ni dingin ṭhang la thar sau sau ei tiu.
No comments:
Post a Comment