ELECTION LE RINGTUHAI
~Lawrence S Khawzawl
“Chuongchun,
a hmasatakin, thil hnina dâm, ṭawngṭaina dâm, ṭawngṭaipêkna dâm le, lâwmthu
hrilna dâm, mi po po ta dinga inhlân dingin ka ngên che, lalhai le thuneituhai
po po ta ding khawmin ṭawngṭai ro, kawng iengkima, Pathien ngaisak le
inzaumtaka umin, inrema thlamuongtaka ei khawsak diel diel theina dingin.” ~1
Timothe 2:1 &2
Fiemthua an lo hril ang
ngêiin, ei khaw kâwl a hai alkatara
rim a hung innam veng vung ta rêka, election
a hnâi tah ti inhmai ruol lovin a sukchieng hle! Assam Assembly Election chu ei
hmasuon mêka, political party tin
khawm nasatakin an insingsa ṭana, ei khawsûng, vêngbuk, t.v, chanchinbu, social media a hai khawm an campaign-na thu-le-hla chu inchat lovin
hmu ding a um ta zing bawk. Assam khuo-le-tui ei nina angin ei chanvo le ei
pienvo vote chu ei thlâk ngêi ngâi a
t’a, kum 5 sûnga ei ram ṭhuoitu ding thlangna a chun ei rêngin ei pawimaw ta
seng a nih.
Miṭhenkhat ngâidân chun
politics le election hi Ringtuhai inrawlna chi nilo, khawvêl thil le thil
pawrche niin an hmu a, amiruokchu khawvêla ei um sûnga ding chun Ringtu khawm
ni inla ei umna ram ang peia ei thang vêna ding le, khuo-le-tui ei nina anga ei
mawphurna, ei chanvo le ei pienvo indik tak lem a nih. Chuonglai zinga chun, chu
thila ei inhmang dân le ei lo va’n rawl dân ruok chu Ringnawtuhai leh in ang
thei naw nih a, Ringtu ei nina anga thienghlim tak le indik taka ei thang ve
ruok chu thil mâkmaw a nih. Ei Ringtu nina hi Biekin inkhâwm le ramthima ding
sum pêk le ramthar siem ringawt hi a ni nawh a, tûta ei hmasuon mêk Election-a khawm hin Ringtu ei nina
indik tak leh ṭhang ei lo lâk ve a ṭûl takzet a nih.
Ringtu I nina angin
iengtin am hi election hi lo
dawngsawngin lo ṭhang ve’ng I t’a? Mi tam tak chun ei Ringtu nina chu eini
Ringtuhai lâi, eini sûnga chau hmang dingin ngâina an neia, Ringtu thil nilo
hieng Kohran puotienga mi- sawrkâr inrêlbâwlna le khawvêl thil tieng a ni pha ruok
chu mâni Ringtu nina peithla a thilthaw an um hlak. Amiruokchu, Ringtu indik tak
chun Kohran huong sûnga chau nilovin sawrkâr inrêlbâwlna le khawvêl thil dang
danga hai khawm ei Ringtu nina chu ei sawmpei lem ding a nih. Chuong a ni leiin
tuta ei hmasuon mêk election-a khawm
hin Ringtu ei nina anga iengkim zalên le indik taka ei thaw hi mâkmaw a nih.
Sum tlâwmte hmu theina
ding chauva party-a lo va’n rawl dâm,
hotuhai ditsak hlaw nuom leia lo tlâklût tumna dâm, sum tam tak hmu nuomna leia
mâni vote khawm mâni ditthlangna
nilova zawr huomna dâm, midanghai pawisa suma lo thlêmna dâm, mâni hamṭhatna
ding lei chauva mâni sûng-le-kuohai an ditthlangna nilova ‘chu chu kha kha’ vote dinga lo nawrluina dâm, mi sum fa
sia anni vote chuong si lona dâm, sum
an hau ti leia mâni hmasielna leia lo fâkpui lawp lawp dâm le thil dang tam tak
Ringtu nina le inmâwi lo a uma, chuonghaia inthawka ei insiekieng chu thil tha
tak ning a tih.
Election hun sûng boruok
laia sum tlâwmte fâk ding I hmua, inhawi I chênna khan I hmâkhuo ding kum 5 sûng
kha nasa takin a hril a nih ti hrea, lungril fîm tak puta, mâni phîngpui hmâkhuo
chau ngaituo lova, hi election hin
ram le hnam le sakhuo le iengkim hi a sukdanglam thei a nih ti hrea party tin manifesto-hai tiema, bichienga, inthûk taka ngâituoa, an campaign thu le hla, thuhnung le thuhma,
thudik a ni le ni naw hai fie thlapa, ei Ringtu nina leh inkal a um am, Bible
thu leh chu party thil fepui dân chu
an inrem am, candidate hai hi mitha le
indik an ni am, hi party hi lo vote tling ta inla ka ram le hnamin a
sietpui ding am, ka sakhuona hi a derthâwng ding am tihai hi mitinin ei
inngaituo chita, chu hnungah Pathien kuomah hnina leh vote ei thlâk a pawimaw tak zet a nih.
Kohranhai khawm
matheilova châwl lovin Pathien buona Pathien kuomah ei ram ṭhuoitu ding ṭhuoitu
ṭha ei hni tlut tlut a ngai a, election-a
hlawtling theina dinga hmalatuhai po po, vênghimna sinthawtu dinghai, sawrkâr
roreltuhai, vote tiemtu dinghai po po
zalên le indik (free and fair) taka iengkim an thawtheina dinga Pathien kuoma ṭhangpuina
ei lo hni hi ei thawding pawimaw tak a nih. Hieng huna hin Kohran thuoitu tam
tak chu to tawkin mâni berâmhai kuomah thutha khawm hril ngam lovin an um hlak,
hi hi thil indik lo a nih. Kohran thuoitu tinin mâni berâmhai kuoma indik tak
le zalên taka mâni chanvo vote thlâk
dinga infui le Pathien ditzâwng le Bible inchûktirna mila election boruoka an inhnamhnawi dinga infuina pêk hi ei uor nâwk
sau sau lem ding a nih.
Chu party chu an tha nawha, hi party hi an tha lem ei ti nawh a, hi candidate hi a tha a, chu tieng candicate chu a tha nawh ei ti bawk
nawh. Amiruokchu, a chunga inkhîna hmangruo ei târlanghai a’nthawk khin tu am a
tha, tu am a tha naw chu suithei ning a tih. Mitinin mâni sie le tha Pathienin
a mi pêk hi Tawngtaina leh indik taka hmanga, Ringtu ei nina leh ei Bible min
chûktir dân ang taka lungril thienglim puta, chângdân mâwi le umdân mâwi leh hi
election a hin ei ṭhang ve a, ei vote hlu tak Pathien ditzâwnga thlâk
seng dingin ei infiel a nih.
No comments:
Post a Comment