H.S.A : RUOL SIEMNA THA

Mi tam takin HSA thatna, a hlawkna le an mimal nun khawma an lo tawnhriet hai an ziek ta hlaka, keikhawm tuta tum chu H.S.A; abiktakin Joint Headquarters, Shillong le inzawma ka mimal tawnhriet thailang ve ka nuoma chu chu “HSA:Ruol Siemna Tha” tiin kan buk a, H.S.A thilthawna haia ka thang hlak leia ruoltha tak tak Shillong khawpuia ka neipha chungchang a nih. HSA Jt. Hqrs., Shillong in Diamond Jubilee a hmang puola Souvenir a ni bawk leiin Shillong khawpuia kan chuk sunga ruoltha tak tak ka tawng hai, kan hmel hrietpui hai le vawisun chena ka hmelhriet hlak nita hai po po ka ngaihlutna le ka hriet zingna in hi ka thusep ziek hi kan hlan (dedicate) nghal bawk.

Hmel hriet umlona ramah HSA

Shillong hi vairampur khawm nilo, tlangmi khawpui, Hmar tawng hmang tamtak umna, mani khuo le veng le in ang vang nisienkhawm ka ta ding chun hmelhriet ngai um lona hmun kha a la ni tlat a. Facebook a’nthawka an hming le hmel ei lo râl hriet le, lekhabuhaia dam an hminghai eilo hriet ta hlak um de hai sienkhawm a tak taka hi chu ka hmelhriet sa, ka tlângnêl sa ti ding kha ka nei der nawh! Kum 2011 khan Guwahati a’nthawkin B.A Mass Media zawm dingin St. Anthony’s College, Shillong ah ka hung insawna, ka hostel umna Zawlbuk Hostel, Malki hlak Hmar tawng hmang le Hmar kohrana inkhawm hlak an um der si nawh a, HSA members lem chu an um naw nasa. College a hlak Hmar tawng hmang reng reng ka hmu ngai nawh. Thla iemani zat ka kai hnung chun Facebook fethlengin Hmar Group pakhatah HSA Shillong in Freshers’ Meet a hmang ding thu programme an hung post ta ngei a, chu post ka hmua inthawk chun thang ngei ngei ka tum a, ka thei ang angin programme details hai, a hmun le hun hai chu ka ngaiven ta zinga. Chuongchun thuoitu thenkhat khawm kan biekpui thei ta ngei. Lawmum ka ti kher el. Amiruokchu kha an Fresher’s huoihawt ni tak kha kan college 1^st Term exam kan nei laitak a lo ni nawk nghala. Sienkhawm HSA programme a ka thang chakna le ka hnam chanpuihai Hmar tawng hmang ngeia programme Shillong khawpuia ka vawikhat thangna ding chu bansan ka tumnaw ru tlat leiin ka Exam thulin U So So Tham Auditorium a chun ka fe ta ngei a. Hmelhriet hmu ding an vâng kher el. Khanglai huna HSA President Tv. Joseph V.Tuolor kha ka Haflong mi chanpui le kan panthlangpa hlui lo ni hlak sienkhawm kha programme hmang dinga hung thang hman tawk tawk a ni bawk lei le Hotu lu a ni leiin ka hmu phak nawh a, sienkhawm ka thla a phâng chuong nawh. Ka hmelhriet hlak hai umnaw hai sienkhawm ka tawng ngeia ka biek thei tho anni leiin buoina ding a um nawh a, Fresher’s Introduction a hai khawm ka thang ngeia, khanglai huna Host-tu khawm ka Laibung pa ngei ngei Tv. Lienthanglur Khawzawl a nih ti a hnungah ka hriet a, a hunlai khan tum anni tuhai am anni ti hrenaw lang khawm hma tieng peia HSA Programme a ka thang pei na zarah ka hmelhriet ngainaw hai kha ka hmel hriet hlak le kan hnai pui hai anlo ni lem tawl tah a nih. Kha nia programme a khan stage a introduction va pek baka khan ka lut tira kan thungna kha programme tawp chenin insawn thak lovin kan thung tluonsuok zak niin ka hriet! Dr. Lal Dena, Manipur University a’nthawkin Chief Guest in a hung thanga thu tha tak a hril bakah, râl khata kalo ngaisang em em a tak ngeia kha HSA Programme ka thang leia ka hmu pha kha a manhla ka ti hle. Ama bakah ral khata an hminghai ka lo hriet ta hlak: Pu Louis L. Keivom, Dr. Zawlthanglien Changsan, Pu Ramthienghlim Varte, Pu Rohminglien Buhril, Rev. Dr. J. Huoplien Neitham, Robert Wilson Thilsong le mi dang dang lekhabua an hminghai ka lo hmelhriet ta hlak Shillonga hun sawttak lo um ta hai ka hmu phaa, kha tuma HSA Shillong Freshers Meet a ka thang kha ka ta ding chun ka ralkhat hming hriet hai a taka hmuna le ka hmel hriet ngailo hai ka hmelhriet tharna  le a hnung peia ka hmel hriet em em hung ni pei ta hai ka vawikhat hmuna ani leiin ka theinghil thei nawh a, College exam thul thaka thang nilang khawm vawisun chen hin kan sir nawh a, Shillonga ka um sunga Ruol tha tak tak ka hung nei pei naa hmathuoitu a nih ka tinaw thei nawh.

Hmel hriet hauna

Kum 2011 Fresher’s Meet a ka thangzo chun hmel hriet chi te te ka hung nei pei tah a, Facebook a hai dam hmel hriet thar Shillonga lo um ve ka programme thang vena a thang ve hai ka hung hriet tung ta peia. Chu khelah ka unauhai Alu Kudam tienga umhai leh kan hung innel pei ta leiin Madanriting tienga fe zeu zeu châng leh Hmar Kohran ICI a dam special programme annei chang U Leonard thuoina zarin ka thang ve ta peia, chuongchun a tira HSA Programme a ka hmuhai kha anlo um ve pei leiin vawikhat neka tam ei hmu ta khan chu ei hmelhriethai dam anlo hung ni pei tah a, thla khawm a ngam deu deu tah. HSA Sports Jingkieng Field a hai khawm class tina dam ka hang thang ngam ve tah! Kum 2012, kum hni a hung invawi meuh chun Freshers ka ni bik ta nawh a, hi tum hin kan college sak el Donbosco Technical Hall-ah Freshers hmang a ni leiin hmel hriet ka lo hau ta el khelah ka tlângnêl pha sawt. A hun khah kan college exam ni leh an tuok ta rêka sienkhawm college sak el tho a ni leiin exam zovin programme a chun ka thang tlang nghala inhawi khawm ka ti ta in hmel hriet inbiekpui ding khawm ka hau ta hle. Chu el khelah Guwahati tienga ka hmel hriet ta sa Pu Thanghlun Hmar, Chief Guest le Singer thenkhat a hung thuoi hai kha ka hmel hriet anlo ni leiin anni khan anmi suk tlangnel pha sawt bawk!  Chuongchun HSA Programme ah ka thang ve peina zara chun hmel hriet thar le ruol thar ka tawng peia ka thla a muong deu deuvin nina nei kher naw lang khawm HSA khawm ka ta anga ngaina, keikhawm ka thang ve ngei a nih, puotieng mi kan nawh, a sunga mi ka nih ti theina ka neiphain ka hriet.

Kum 2012 hin chun a lêt tam takin hmel hriet thar le ruol hnai tak tak ka hung nei pei tah a,  thla iemani zât hostel ka zawm hmain Alu Kudam-ah ka unauhai kuomah ka um sûng ICI Biekinah kan khawm ve hlak leiin ka tlangnel pha sawt a, a hnung peia lem chu Pentecost Sunday a dam, Special programme dang dang KTP Anniversary le Blessed Choir hai hung inzin tum khawmin ka thang ve pei thei tah. Shillongah Hmar mi tamin Hmar tawng hmangna Biekin tam sienkhawm Hmar tawng hmangna hmun vengbuk le hostela um kan nawh a, nitina ka fena kan college hlak Hmar tawng hmang hlak hai kai tlawmna a lo ni bawk leiin tawng dang hmang vawng laia khawsa tam ka nih a, ka lekha inchukna le ka subject in a lo zir bawk leiin Hmar tawng hmangna ding chu ka nei tlawm hlea, chuong lai zinga chun HSA Programme kha ka ta dinga hlu em em el, Hmar tawng hmanghai a hlawpa tam deu ka hmu theina le ka tawng ngeia kan biekpui theihai kuoma thlamuong taka ka umna hun a nih.

Ruol siemna tha tak

Kum 2013 a hung inher suok meuh chun kan chukna tienga khawm a hmawr ka bâwk kum a hung ni tah a, nasatakin mi hmelhrietna kawnga chu hma ka sawn ta hle. Inhmaih chi lo thil pakhat chu a taka HSA Programme a ka thang khêla khan, khâng hun laia Shillonga Hmar hai chanchin inhriet pawna bik Facebook group hai kha mani hmelhriet thar hai leh inbawzuina le intlângnelna siemtu pakhat a ni bawk. College a khawm Final year ka ni ve tah a, mak takelin vawikhat chu Library ah lekhabu ka zawng lai nunghakte pahni Hmar tawng hmang ri ka hriet ta ngeia ka lungril rûk taka chun ka lawm hlea, mak khawm ka ti hle. Hmar tawng biek ding pakhat khawm kumhni sung ka hmunaw laiin hi kum ruok hin chu Hmar tawng hmang ri ngei ka hriet tah a. Anni chu va pana va bein kan hmelhrietpui nghal chuong nawh a chu a hnung daiha ka hmelhriet em em hai anhung ni ta thova. Khang hunlai khan HSA Jt. Hqrs., Shillong hnuoia khan College Unit hai a um ve nawh a, um ve sien tina lien tak ka neia, amiruokchu kei tak Hmar tawng hmanghai laia tla tlumlo ka ni leiin tu ham an kai ti khawm ka hriet nawh a, ka ta ding chun hma lak a harsa hle. Sienkhawm vâi hnungah Facebook fe thlengin ka Hmar chanpui kan college a lo kai hai chun an mihung zawng suoka chuongchun kan college bika Hmar tawng hmang kai hai inpaw zuolna dingin pawl indin kan rawt tah a, a hming dingin Hmar Anthonian Family kan phuok nghe nghe a, keikhawm Leader dingin anmi thlanga chuongchun College a khawm Hmar tawnga inbiekpui ding le hmelhriet hnaih mani chipui hai ngei ka hung nei ta leiin college kai khawm inhawi ka tipha khawp el. Hi kum hin Shillong khawpuia Hmar ha’n  kum tamtak Sikpui Ruoi an hmang ta ngainaw chu HYA hmalaknain hmang thar nawk a nih a, Hmar Anthonian Family hmingin Hmar tawnga Bookmark, Fund Raise na dingin St. Anthony’s College a kai Hmar students han  kan zawra, kan hlawk pha hle. Hmar Anthonian Family bikah a college suok tho Pu Hubert Khobung khawm hmuingil takin Shillongah a khawsa ve zing leiin Adviser-in kan hmanga, an inah inhmukhawmna le bufak tlangna hai kan nei bawka, kan innel pha tawl sawt el.  

HSA Shillong zar lieu lieuvin

Kum 2013, St. Anthony’s College-a B.A Mass Media Final year ka thaw kum chun Shillong khawpui sîr el Umran hmunah HSA hmalaknain Hmar Leaders Conclave  an buotsaia. Chutaka chun student quota khawm a um ve leiin Shillonga HSA Thuoituhai be pawin ka thang ve nuom thu ka hrila chuongchun HSA Shillong aiaw in Umran hmuna chun keikhawm ka fe ve tah a. Hmar hnam sunga mi pawimaw tak tak hai, Hmar Inpuia inthawka, Kohran Thuoitu lienhai, politician lienhai le mi challang po po an kim thawk khatin ka hriet. Kha tuma ka thang ve thei khah vawisun chen hin ka ta ding chun intitheina tham niin ka la hriet. Manipur, Mizoram le Assam sunga hnama mi pawimaw po po chu an thangkim thawkkhata, a taka ka ralkhat hriet le ngaisang hai po po a ruola ka vawikhat hmuna anni tawl leiin ropui ka tiin ka theinghil thei nawh. Chu khela, keima mimal bikah Pute Simon L. Infimate hai, Pute Brando H. Keivom hai, Pi Mawii Darngawn le a naunu Rhea Hrangchal hai, U Lalremlien Neitham hai le Shillong HSA a thuoitu pawimaw tak tak hai ka tlang nel tak tak pha na le kan hnaih pui bik phana a ni leiin hi programme a ka thang thei hi lawmum ka tiin vawisun chen khawm hin kala theinghil thei nawh. Hi taka inthawk hin Pute Simon hai, Pute Brando hai, Pi Mawii le ka ruolnu Rhea Hrangchal hai hi ka ngaina zuola, HSA programme peia khawm kan inthlawp tung pei pha a, Shillong a lekha inchuk khawm a min hawitir phain, ka um tira inhawi ka tinaw zie le Shillong ka hung um ding hmasa tak laia ka umna hlui Guwahati maksan ka rin zie le ka ruolhai leh mitthli puma kan in the hun  ha chu ka theinghil chieng hle!

HSA Shillong hmanga ka mimal taka hmelhriet ngailo hai leh kan inhmelhriet tampha zie hi inzawt seng naw ning. Ka ta dingin HSA Shillong hi a hlu em em a, ka ngainain ka ngaisanga, inchuklai Shillong khawpuia la hung um pei dinghai khawmin belbul takin hmanghai sienla, HSA Thuoitu hai khawma kei anga ruol ding le hmel hriet neilo hai lo biek tlâng nela ruolthaa lo siem pei dingin ka ditsak tak zet. HSA Damzing raw se.

___________________________________________________________________________--

NOTE: Hi article hi HSA Shillong Joint Headquarters Platinum Jubilee 2017 Souvenir-a insuo dinga ka ziek a nih. (L.S.K)