TO ZING

 TO ZING
“To zing unla, Pathien ka nih ti hre ro” (Sam 64:10, BSI-CL)

                     ~Lawrence S. Khawzawl

Mi bautam, bauthiem, tawngpei, tawngnuom,  tawngtam, tawngthiem, tawngthei, tawng septhiem, tawngthlum, tawngduam le a dang danghai hi mi tawngpeihai ei kona tawngkam a nih a, a thanaw tieng kawk kher a ni nawh. Mi tawngtam ni hi mihriem mizie chikhat thenkhatin an nei ve hrim a nih a, hmang tangkai chun hlawk tak a nih. Amiruokchu hitaka hin, tawngtam thatna mani, hlawkna manihai hril ei tum nawha, tawngtam letling chie- “to” a pawimawzie le Pathien rawl hreding chun to zing a pawimawzie ei hril ding a nih.

1. TO UMZIE: To umzie chu a chunga ei hrilta ang khin, um tawk tawk, tawng tamlo tiin mawl takin ei hrilfie thei a. Ei thupuia “to zing” ti khi Delhi Version, Revised Edition a chun “To chip” a tih a, chu chun to umzie a hrilfie chieng lem. To chipa um chun ri le thildang hrim hrim khawm sukpuok lo ding, thil ri hrim hrim siem lova, dei rawka um tina a kawk. Chu chu ei thupui hriltum khawm a ni bawk.

To zing ei ti hin tawnglo, anglo, min an mi biek khawma tawnglo tiengpang a kawk nawh ti hrethar inla. Ei thupuiin a hriltum tak chu “Ringtu nun inthanglienna ding le Pathien rawl hre ding chun”  to zinga uma, Pathien leh inpawlna huntha siemrawn  a nih. Zingkar tho hlima Bible tiema tawngtaina nei dam, hun thawveng nei changa Fienriela fe dam le mani nitin hringnun pangai a’nthawka chawllawk (break) neia Pathien rawl hre dinga mani insieruok hai hi to dan chikhat a nih.

2. TO HLAWKNA: Ringtu nuna hin to thei hi a pawimaw em em a, mi to thei mi mi chu Pathien rawl hre rawn mi an ni hlak. Mi to thei mi chun, mi tawnglai ri a siem ngai nawh a, thildang a ngaituo ngai nawh a, to zingin mithuhril pawimaw titakin a ngaithlak hlak. Mi to thei mi chun mi tawng a ngaithlak ngun leiin mi harsatnahai khawm a hrietthiem puia, an harsatna ang peia thangpui dan ding khawm a hriet hlak. Chuleiin Rawngbawltu le Ringtu ta ding chun to hi a pawimaw em em a nih.

3. PATHIEN RAWL HRE DING CHUN TO ZING A NGAI: Ei khawvel setak, chanchin thanaw tamtak mituomna rama hin to chipa ei um naw chun Pathien rawl hriet dan a vang tah. Nitina Pathien rawl ei hrietnaw hlak chun Ringtu nun chu hrat dan a um si nawh a, Pathien rawl hre ding hlak chun to chipa um rawn a tul si. Chuleiin Ringtu nuna ding chun to zing a lo tha tak a ni hih. Ei khawvel hringnun fe mekna, mani senga buoi tak taka ei tlanna ram le sawltaka taksa ram ei ngaituona a hin khawvel hin a mi hip hrat em em a, khingtieng pang ei Ringtu nun a ruok chun Pathienin to chipa uma, a thu bi nguna, ngaithlaa, suia, a rawl ngaithla, ama leh inpawla, chutak a’nthawka ei thlarau nun inthanglien dingin a mi dit.

             Ei chang thlanga ei hmu ang khin,  Pathien ei inhumhimna le ei hratna, lunginzing laia thangpui vartu hnai zing  chun Ama ei hriet chiengna ding chun “to zinga” ei um a mi phut a nih.

                                                                                             (28th April, 2017, Haflong)