THEOLOGY INCHÛKNAHA I HMÂKHUO DING

CAREER : HMÂKHUO

THEOLOGY INCHÛKNAHA I HMÂKHUO DING

Ringtu Kristien ka nih e ei intiha chu nu le pa tamtak chun mâni nâuhâi hmâkhuo (career) thlangna kawnga hin Doctor le Engineer ti dâm hi ei thlur bing nasa bîk hle ela, amiruokchu ei hringnuna pawimaw êm êm, sakhuo inchûkna theology tienga fe dinga inchûktirna pe hi chu vâng hlêng ei tih. Chun ei ngâidân chun theology inchûk chu Pastor ding ngêi ngêia ngâina chauh ei neia, thildang thaw ding a um nawha ngâina ei nei bawk. Ringtu ei nina a sâwt taha chu Theology inchûkna le theology inchûkzo hâi hmâkhuo ding hrietna kawnga chuh ei mit a la’n del hle de!

A hmasataka dingin Theology inchûk ei ti hin Kristien sakhuo inchûkna angin ei ngâi tawpa, amiruokchu sâkhuo dang dang hâi khawma an sâkhuo thu inchûkna chu theology tiin an ko seng tho. Chuleiin tuta ei hril ruok hi chu Kristien Theology inchûkna a nih.

A ni ngêia, mi tamlem theology inchûkhâi chu an sakhuo a seng khan sakhuo ṭhuoitu nîna an chang hlak, amiruokchu hi hi chauh hi a ni nawh mihâiin theology an inchûkna san hi. Entirna dingin Kohran siemṭhatu pawimâw Martin Luther dâm kha Theology a Graduate a niha, chu a theology inchûk chu America ah mipui chanvo hlutzie khêkpuina in a hmang. Chuleiin Theology inchûkna chun ânchûktu ah a sakhuona le inmila a hrietnahâi chu a hnamhâi annawleh a mipuihâi lâia hmang ṭangkâi theina a pêk a nih.

Hieng a hnuoia târlanga umhâi hin Theology inchûkhâi ta dinga an hmâkhuo ding a hril.

1.Theology inchûkhâi chun sakhuo dang danghâi thu le an ngâidân fêpui dânhâi an inchûka, chuong an ngâidânhâi chun iengtin am khawvêl hi a tuom vêl ti an inchûk sa bawk. Sâkhuona thu inlet sâwng dânhâi an hrieta, chuong sakhuo buhâi chu mimâwltakhâi kuoma hrilfie dân khawm an hriet. Chûbâka chun midang danghâi biektuo dân an hrieta, hringnun mil rema sakhuo thuhâi  chîk nâwk zuola suizuia hmet rem dân an hriet bawk.

Sinthâwna tamtak chun hieng thilhâi hi theology studenthâiah an hmu chun ieng ang sinthaw ding khawm nisien dit bîk an tih. Theology inchûkhâi chun insêlna kawnga khawm mâni ngâidân tlang taka hrila amiruokchu midanghâi lungril sukna chuong lova ṭawngdân an thiema, chuonghâi chu a nih a ruola sinthaw tlângna a khawm mîn an dit chu.

2. Theology inchûkzohâi ta dinga sin umhâi

A chunga ei hrilta ang khan Theology inchûkzo tahâi ta dingin sinthÂwna ding a tam hle a, amiruokchu sinthaw ding bîk theology inchûkzohâi ta dingin a uma, chuonghâi chu a mihriem inhnikna le inhnik zaângah fe thei a nih. Mâniin a Theology degree a khan ieng sintak am a thâwnuom ti sukchiengin a hmâkhuo ding bîk chu thlang thei a ta, hieng a hnuoia sin suklanga umhâi khawm hi Theology graduatehâi fêna thei a nih

• Pastor (Associate, Youth)
• Relief Worker
• Social Worker
• Missionary
• Community Organizer
• Church Organizer
• Religious Teacher
• Nonprofit Program Administrator
• Worship or Song Leader
• Chaplain
• Counselor
• Spiritual Empowerment Leader
• Author/Writer
• Speaker/Speechwriter
• Resident Director

Tûta ṭhangtharhâi huna hin chu hmâlâia ei ngâidân ṭhing Theology inchûk chu Pastor chauva hmangtheina kha peithlâk nita sien, theology inchûk hi subject danghâi inchûk ang bawkin sinthaw ding tamtak a uma, Biekin sûnga rawngbâwlna el khêlah khawvêl pumpuiah rawngbâwlna ding kawt ân hawng zing a nih ti hrea, ân hnikhâi khawma mâni sûng le kuohâi theida leia to bopui el lovin, hieng a chunga sin ei târlang po pohâi khêlah Pathien rama rawngbâwlna a nih ti hrea, Theology inchûkna chu a tak taka fêpui ngam dingin inbuotsai a hun.

                                                                                 (4th August, 2014, Guwahati for Zawlbuk Today)